Hâi lơ 29/3, Hneăng hôp tơpui leăng roh má 17 pơla Đảng Kŏng san Việt Nam ƀă Đảng Kŏng san kong têa Sinuâ hiăng tơkŭm po tiô troăng mơ’no tơdrêng tung um tiô troăng hyôh măng. Hneăng hôp tơpui leăng roh kố dó inâi ‘’Túa ki rơkê plĕng ‘na tơmiât pêi rơkê pơkuâ pơlê pơla tung rơxông xúa kŏng ngê̆ kơxô̆’’.

Xông tơpui a hneăng hôp, pôa Nguyễn Xuân Thắng – Kăn cheăng tung Khu xiâm kal kí, Kăn hnê ngăn Hô̆i đong tơpui leăng Tơnêi têa, Kăn pơkuâ Hok viê̆n Chĭnh trĭ Kuô̆k ya Hồ Chí Minh tối nhên, Đảng Kŏng san Việt Nam đi đo nhuô̆m, mơnê tung tơdroăng pơkuâ pơlê pơla tung rơxông xúa kŏng ngê̆ kơxô̆.

Roh pơ’lêh pêi cheăng xúa kơmăi kơmok roh má 4 ƀă tơdroăng ki ai hên kŏng ngê̆ nếo troh hên tơdroăng nếo ai ƀă tơdroăng Đảng pơkuâ mơnhông mơdêk pơlê pơla. A hneăng hôp tơpui tơno, Kăn pơkuâ péa pâ pơrá mơnhên ki kơnâ dêi tơdroăng thăm tơpui leăng pơla pơla péa Đảng tung rơxông nếo.