Hneăng hôp xua Vi ƀan kong pơlê Khánh Hòa tơrŭm Khu xiâm tơpui kâ, Kơ koan teăng mâ kong têa Indonesia tơkŭm po, veăng amê ai lối 350 kăn teăng mâ. Nôkố, tung ASEAN, Indonesia cho khu tơrŭm cheăng tê mơdró kân má 3 dêi Việt Nam, ƀă Việt Nam cho khu tơrŭm cheăng kân má 4 dêi Indonesia.

Tung pơla kố nah, pêi lo liăn tê mơdró pơla péa kong têa hiăng tâk hôm, sap ing 9 rơtal dollars Mih a hơnăm 2019 hiăng tâk 14 rơtal dollars tung hơnăm 2023. 2 kong têa dế tơrŭm a hên kơvâ cheăng môi tiah pêi chiâk deăng – ká xi xŏng, ôm hyô, trâm mâ pơla kuăn pơlê, hnê hriâm – hnê mơjiâng tuăn ngôa rơkê...

A hneăng hôp, khu râ kăn pơkuâ thăm tơrŭm mâu kơvâ cheăng môi tiah pêi chiâk deăng xúa kŏng ngê̆ rơxông nếo, ká xi xŏng krá tơniăn, cheăng kâ xúa kŏng ngê̆ ƀă tơrŭm cheăng ôm hyô, mơdêk tê rôe tơmeăm ngi kong têa ê.