Hngêi mơđah tơbleăng Hoàng Sa ối a troăng Hoàng Sa, môi tung mâu troăng kân kĭng têa kơxĭ lĕm má môi ối tung bêng Thọ Quang, pơlê kân Sơn Trà, pơlê kong kân Đà Nẵng. Mâu hâi ki kố, hên hok tro, sinh viên, droh rơtăm, mô đô̆i hneăng hdrối nah, tơmối tung tơnêi têa ƀă kong têa ê rơtế mâu ngế ki hâk vâ hơniâp lĕm ƀă pêng păm tơdroăng tuăn pâ têa kơxĭ rơlố pơlê xiâm hiăng troh a kố lăm ngăn, ti tăng plĕng.

Troh lăm ngăn mâu um méa ‘na Hoàng Sa, Trường Sa mơđah tơbleăng a Hngêi mơđah tơbleăng Hoàng Sa, pú hmâ Lê Khánh Ly, sinh viên hngêi trung Đăi hok Sư phăm Đà Nẵng tâ tung hiâm mơno:

“Cho môi ngế hơnăm ối nếo drêng troh lăm ngăn Hngêi mơđah tơbleăng Hoàng Sa, tơ’nôm môi xôh nếo á hlê plĕng nhên ‘na hnoăng pơkuâ têa kơxĭ krih tơviah dêi Tơnêi têa, ki rơhêng vâ tối ƀă 2 rơlố Hoàng Sa ƀă Trường Sa. Mâu ngế hơnăm ối nếo môi tiah ngin rế hía rế mơdêk tâ mê nếo hlê plĕng, pơtâng tối troh mâu ngế rơtâ tá pơtối mơnhên hnoăng pơkuâ têa kơxĭ, rơlố krih tơviah dêi Tơnêi têa. Hoàng Sa ƀă Trường Sa cho dêi Việt Nam’’.

Mâu lơgât, mơ-éa chêh ton nah, kơtăn kố hrĭng hơnăm ƀă um kơchuâ ton nah troh mâu pơ’leăng prêi, kơtôu kơpáu, akrot ƀă hía hé, tâi tâng cho mơnhên tơdroăng ki tâp tơneăn, mơdâng kơƀâng hnoăng pơkuâ dêi Việt Nam a 2 rơlố Hoàng Sa ƀă Trường Sa. Kố cho mâu tơdroăng mơnhên ó rơdêi ‘na hnoăng pơkuâ dêi Việt Nam ƀă rơlố Hoàng Sa; hnoăng, tíu cheăng, ki kal dêi têa kơxĭ rơlố tung tơdroăng mơjiâng ƀă gâk kring Tơnêi têa. Trung ŭy Lê Xuân Thiêm, Kăn phŏ Khu mơhnhôk kuăn pơlê, Đông mô đô̆i gâk tơkăng kong Sơn Trà, Khu xiâm pơkuâ Mô đô̆i gâk tơkăng kong pơlê kong kân Đà Nẵng tối ăm ‘nâi:

“Tung pơla kố nah, kăn ƀô̆, mâu lêng Đông mô đô̆i gâk tơkăng kong Sơn Trà tơrŭm ƀă khu râ kăn pơkuâ hnê ngăn cheăng Đảng, khu râ kăn pơkuâ pơlê kong kân, mâu khu cheăng ki tơdjâk đi đo tơkŭm po mâu roh pơtâng tối. Tơbleăng mâu roh pơtâng tối tơkŭm lơ krê, ngin rĕng ‘nâi mâu tơdroăng rơkê nếo, tơdroăng xiâm ki kal troh tơdroăng têa kơxĭ rơlố dêi Việt Nam. Ngin đi đo tơkŭm po mâu tơdroăng tăng cheăng pêi ăm pơlê pơla ăm kuăn pơlê tơnăng ká xi xŏng tung pơlê kong kân, kum rơtế ƀă kuăn pơlê lo a têa kơxĭ rêh ối kơnôm têa kơxĭ, gâk kring krá tơniăn hnoăng pơkuâ têa kơxĭ rơlố dêi Tơnêi têa Việt Nam’’.

Hngêi mơđah tơbleăng Hoàng Sa xua Vi ƀan tơring Hoàng Sa, pơlê kong kân Đà Nẵng pơkuâ. Tíu kơnâ liăn toăng hngêi ngiâ tơdrăng lo têa kơxĭ Biển Đông, châ mơjiâng tung ƀăng deăng vâ chê 1.300 met karê. Tơmeăm châ djâ ăm xúa sap ing khế 3/2018, lôu péa tơdah tê kơtê ăm kuăn pơlê ƀă tơmối. Rêm hơnăm, tíu kố tơdah chât rơpâu roh ngế kuăn pơlê ƀă tơmối troh lăm ngăn, ti tăng plĕng tơdroăng mơnhông mơdêk ton nah.

Ai lối 300 tung kơxô̆ chât rơpâu mơ-éa chêh ton nah, tơmeăm ton nah tơbleăng a kố cho vâ mơnhên tơdroăng ‘na hnoăng pơkuâ têa kơxĭ rơlố dêi Việt Nam ƀă 2 rơlố Hoàng Sa ƀă Trường Sa. Pôa Lê Tiến Công, Kăn pơkuâ Ƀơrô Vi ƀan tơring Hoàng Sa, Kăn pơkuâ Hngêi mơđah tơbleăng Hoàng Sa tối ăm ‘nâi:

“Vâ tơdah pêi cheăng lĕm tâ tơdroăng kal vâ tơmối lăm ngăn ƀă mâu kơbố tơmâng rơhêng vâ ti tăng plĕng ‘na rơlố Hoàng Sa, ngin ai pơkâ ƀă xuân hiăng pêi pro tơdroăng tơkêa bro ‘na pơhlêh xúa kơmăi kơmok ‘na mâu tơdroăng kal ƀă tíu mơđah tơbleăng a Hngêi mơđah tơbleăng Hoàng Sa ‘măn tung website dêi tíu cheăng vâ kuăn pơlê kô chiâng ti tăng plĕng tơdroăng ‘na hnoăng pơkuâ dêi Việt Nam ƀă rơlố Hoàng Sa’’.

Pôa Võ Ngọc Đồng, Kăn pơkuâ Khu pơkuâ kăn ƀô̆ hlối pro Kăn hnê ngăn Viƀan tơring Hoàng Sa, Pơlê kong kân Đà Nẵng mơnhên:

“Ngin hnê mơhno Hngêi mơđah tơbleăng Hoàng Sa mơjiâng tơdroăng pêi, pơkâ pêi mơdêk tơdroăng pơtâng tối vâ hlê plĕng trâu hơngế ƀă mơdêk hnoăng tung mâu râ kuăn pơlê ‘na hnoăng pơkuâ têa kơxĭ rơlố, rơlố Hoàng Sa. Ngin hlối pêi pro tơdrêng tơdroăng pơtâng tối ƀă mâu tơdroăng lăm ngăn, tăng mâu hlá mơ-éa chêh ton nah, hnê hriâm lĭch sưh kong pơlê dêi mâu hngêi trung hriâm tung pơlê pơla. Ngin tơrŭm ƀă Khu pơkuâ Đoân Droh rơtăm pơlê kong kân, khu pơkuâ Hnê hriâm ƀă Hnê mơjiâng tuăn ngôa rơkê, Khu pơkuâ Ôm hyô hbrâ djâ mâu tơdroăng ki kal ‘na Hoàng Sa troh ƀă tơmối tung tơnêi têa ƀă kong têa ê. Ki rơhêng vâ tối, tơkŭm po mơđah tơbleăng troh lâp lu troh mâu hngêi trung đăi hok, phôh thông tung pơlê kong kơdrâm vâ hok tro, sinh viên, khu hơnăm ối nếo châ ‘nâi mâu tơdroăng ki kal, mâu tơdroăng mơnhên ‘na tơdroăng ki khât ‘na tơdroăng mơnhông ton nah, tro tiô luât xuân môi tiah môi tiah nôkố ‘na hnoăng pơkuâ Hoàng Sa’’.

Hoàng Sa ƀă Trường Sa sap ing nah troh nôkố đi đo cho môi iâ tơnêi mơ-eăm chhá hơ’nêh, krih tơviah, ôh tá păng klâ tơnêi tơníu Việt Nam. Việt Nam ai tŭm tơmeăm mơnhên sap ing ton nah, tro tiô luât ƀă đi đo tơbleăng, mơnhên hnoăng pơkuâ dêi Việt Nam ƀă 2 rơlố Hoàng Sa ƀă Trường Sa./.