Khu râ kăn hiăng troh lăm pôu ƀă rơkâu Têt Khu rŭm môi tuăn ƀok phop pâ nhuô̆m tơnêi têa kong pơlê Trà Vinh, kăn ƀô̆ hiăng pơtê cheăng xua hơnăm hiăng krâ, mâu ngế cheăng kăch măng nah tung kong pơlê. Pôa Y Thanh Hà Niê Kơđăm tối mâu troăng hơlâ mơnhông mơdêk kơpong hdroâng kuăn ngo tối tơdjuôm ƀă kơpong vâi krâ hdroâng kuăn ngo Khmer peăng hdroh tơnêi têa tối krê.

Ki rơhêng vâ tối, tung hneăng má 14 pơla kố nah, Kuô̆k hô̆i hiăng kĭ tơdroăng tơkêa bro tâi tâng ƀă tơdroăng pơkâ pêi tơnêi têa mơnhông mơdêk cheăng kâ – rêh ối pơlê pơla kơpong vâi krâ hdroâng kuăn ngo hneăng hơnăm 2021 – 2030 ƀă tâi tâng ivá lối 50 rơpâu rơtal liăn. Pôa Y Thanh Hà Niê Kđăm pói vâ mâu ƀok Phop, Kăn ƀok phop pơtối mơnhông mơdêk hnoăng dêi tơná tung thăm pro tơniăn mơjiâng khu rŭm môi tuăn tâi tâng hdroâng kuăn ngo, mơhnhôk vâi krâ kuăn pơlê pơtối mơnhông mơdêk hiêm mơno, mơhnhôk kuăn khôp phop mơ-eăm pêt mơjiâng tơmeăm khoăng, mơdêk pêi lo liăn, mơdêk tơdroăng rêh ối.