Hâi lơ 28/3, a pơlê kong kơdrâm Plei Ku, Gia Lai, Hô̆i đong Hdroâng kuăn ngo dêi Kuô̆k hô̆i tơkŭm po Rôh hôp ăm rơkong veăng tơpui tối ‘na tơnêi tơníu ƀă hdroâng kuăn ngo tung kơxop hlá mơ-éa Luât Tơnêi tơníu ki ‘mâi rơnêu, ƀă tơdroăng ki veăng ai mâ dêi kăn pơkuâ mâu kong pơlê Tây Nguyên ƀă hên mâu khu ki hriăn ‘na khoa hok, ƀă mâu kăn Kuô̆k hô̆i.

Rơtế ƀă rơkong tơpui tối dêi kong pơlê Gia Lai, rôh hôp kố châ xo tơ’nôm 11 rơkong veăng tơpui tối ki ê sap ing mâu kăn dêi kong pơlê Kon Tum, Dak Lak, Dak Nông, Lâm Đồng ƀă mâu khu ki hriăn ngăn ‘na khoa họk, mâu kăn Kuô̆k hô̆i ‘na hên tơdroăng ki tá hâi tơleăng klêi tơdjâk troh tơdroăng tŏng kum tơnêi ối, tơnêi pêi kâ; tơnêi kong; tơdroăng ki xúa tơnêi 5% dêi kuăn pơlê; pro tơdroăng cheăng kâ pêt tơmeăm a kơdâm loăng ƀă hên ki ê kal châ séa ngăn, ‘mâi rơnêu.

Mơgêi rôh hôp, pôa Quàng Văn Hương – Kăn phŏ hnê ngăn Hô̆i đong Hdroâng kuăn ngo dêi Kuô̆k hô̆i ăm ‘nâi: Hô̆i đong hdroâng kuăn ngo dêi Kuô̆k hô̆i rah xo tơdroăng ki xiâm tơdjâk troh mâu pơkâ dêi Kơxop hlá mơéa Luât cho tơdroăng ki teăng mâ ăm kơpong tơnêi vâ hriăn ƀă pơkâ mơ’no mâu troăng hơlâ tŏng kum ăm kơpong hdroâng kuăn ngo; má péa cho pơtroh tâi tâng hlá mơ-éa chêh bro, vâ châ tơdroăng ki môi tuăn.