Kơtăn kố ai 70 hơnăm hdrối, kơnôm ai tơdroăng pơkuâ ngăn tro khât, rơkê plĕng dêi Đảng, lêng ƀă kuăn pơlê pin hiăng pro mơjiâng Hneăng ƀlêi trâng Điện Biên Phủ “Ô eăng lâp 5 pâ - Pro tơdro tung lâp plâi tơnêi’’, plâ hnâp tơdroăng ki tơbriât tong plâ, pơkuâ ngăn dêi xâ Pơhlăng ƀă tơdroăng ki tơbriât pơkuâ dêi Mih. Châ ƀlêi trâng a hneăng roh mê nah hiăng u pa ai tơdroăng tơplâ tơplong, vêh mơjiâng pro tơdroăng ki hơniâp lĕm a Đông Dương. Cho roh ki vêh pro hơniâp lĕm, Điện Biên Phủ bú xuân ối cho môi tíu ki tơ’nhê tơ’nhĕng, ai hên tíu ki kơhlong kơhlăng xua răng pĕng, ƀom kơ’neh, ƀă hên hĕng tơdroăng ki hlâ hía sng khéa.

Pôa Vũ Văn Kiệm, kuăn pơlê a bêng Mường Thanh, pơlê kong kơdrâm Điện Biên Phủ, kong pơlê Điện Biên vêh chôu pâ:

‘’Pơla mê nah, a kơpong kố u pá ai ki klâi, bu ai dâng 3 lơ 4 toăng hngêi ƀrik, ing văng A1 lăm troh a chê kơchơ ki kân nôkố, ôh tá ai tíu pêi cheăng ki lâi ôh. Điện Biên Phủ châ tơleăng lĕm nah, kuăn pơlê xuân ối kơklêa, kơtiê ó khât, maluâ ƀă  mâu hdroâng mơngế kuăn ngo, hâi kâ hmê 2 hdroh la ôh tá phâi’’.

Mâu hơnăm hdrối mê hía nah, Đảng ƀô̆, khu kăn pơkuâ ƀă kuăn pơlê mâu hdroâng kuăn ngo dêi kong pơlê Điện Biên đi đo chôu vế hnoăng cheăng dêi kăch măng, mơdêk hiâm mơno Điện Biên Phủ khên tơnôu tung roh mơnhông pêi cheăng kâ, tơrŭm, vêh ‘mâi mơnhông tơdroăng rêh ối, cheăng kâ klêi kơ’nâi tơplâ. Ing môi tíu ki tơplâ tơplong, tơnêi tíu, kong kế, ngo ngối kơhlong kơhlăng xua răng pĕng, ƀom kơ’neh hdrối nah, hên hĕng têa kơxôu kơxâm ƀă mơheăm chhá, kơxêng châ dêi mô đô̆i ƀă kuăn pơlê pin, Điện Biên nôkố hiăng hơ’lêh kéa, hơ’lêh hơ’nêh, mơdêk dêi tơnêi chiâng môi kơphô̆ ki nếo, ki hloh hlê rơkê plĕng, rêh kâ ối tiô chal nếo, mơnhông ƀă tơrŭm ó rơdêi rơtế ƀă tâi tâng lâp tơnêi têa.

Hên mâu tơmeăm khoăng ki kân châ mơjiâng pro môi tiah tơrai tơƀai Điện Biên Phủ tơdjêp 2 kơpong ki pêi cheăng kâ xiâm dêi tơnêi têa cho Pơlê kong kân Hà Nội ƀă Pơlê kong kân Hồ Chí Minh.

Dế nôkố, kơphô̆ dêi kong pơlê Điện Biên dế châ po rơdâ ƀă mơnhông tro tiô troăng hơlâ ki pơkâ vê hdró dêi kong pơlê. Hnoăng cheăng ki ‘mâi vê hdró kơphô̆, châ pơkâ mơjiaang tơtro, rak vế tơniăn tâi tâng ƀă djâ troăng ahdrối môi hvêa chêng, ing mê, mơjiâng pro tíu ki xiâm vâ mơjiâng tơdroăng pơkâ ƀă pơkâ pêi pro mâu tơdroăng tơkêa bro tung mơjiâng, ‘mâi rơnêu, mơnhông kơphô̆. Tung pơla sap hơnăm 2020-2023, kong pơlê Điện Biên hiăng kĭ tơkêa dâng 20 tơdroăng ki vê hdró a mâu kơpong kơphô̆, ki rơhêng vâ tối cho a pơlê kong kân Điện Biên Phủ. Troh nôkố, kơxô̆ ki vêh hdró nhên tiô tơdroăng pơkâ tơdjuôm tung lâp kong pơlê hiăng châ dâng 36%. Ki rơhêng vâ tối, ki xiâm troh a hơnăm 2025, kong pơlê kô thăm mơdêk hơ’lêh nếo tung tâi tâng tơdroăng cheăng, ing mê, mơjiâng troăng hơlâ ki nếo tung mơnhông pêi cheăng kâ-rêh ối pơlê pơla, tơkŭm mơhnhôk pêi pro ivá cheăng xiâm tung mơjiâng hngêi trăng, troăng klông ƀă kơphô̆ tro tiô troăng hơlâ ki nếo.

Mâu tơdroăng ki hơ’lêh ôh tá la lâi pơtê mê ti xê pro to tơmối tê ki hlo tơviah, mê ing tơná kuăn pơlê a Điện Biên xuân tơviah há. Pôa Lò Văn Diên, kuăn pơlê a bêng Him Lam, pơlê kong kơdrâm Điện Biên Phủ hơ’muăn tối:

‘’Á hlo hngêi trăng, troăng klông nôkố hiăng mónhông ó khât, maluâ tung mâu hơnăm achê pơla kố, xua mê, vâi krâ-nhŏng o hơniâp ro, sôk suâ ‘na kơvâ mơnhông pêi cheăng kâ, mơjiâng tơmeăm khoăng dêi pơlê kong kơdrâm. Tơná á ƀă vâi krâ nhŏng o kuăn pơlê xuân pói rơhêng vâ pơtối mơdêk ivá cheăng vâ veăng kum mơjiâng kong pơlê, pơlê kong kơdrâm rế hía châ mơnhông’’.

Pôa Lê Thành Đô, Kăn hnê ngăn Vi ƀan kong pơlê Điện Biên tối ăm ‘nâi: Hơnăm 2022, kong pơlê Điện Biên ối má 2 ‘na pêi lo liăn ngân, kế tơmeăm tung 14 kong pơlê a kơpong peăng Kơnhŏng, tơkéa vâ tối, ối má 24/63 kong pơlê, pơlê kong kân tung lâp tơnêi têa, cho kơlo ki pêi châ hên kế tơmeăm, liăn ngân má môi tung hên hơnăm pơtối achê pơla kố. Tơdroăng rêh kâ ối dêi kuăn pơlê, ‘na tơmeăm xúa khoăng dâi, ‘na tuăn hiâm mơno hiăng châ tơtêk hên nhên, hngêi trăng, troăng klông hiăng châ mơjiâng rế hía rế hên, rế krá kâk, krúa lĕm.

Hơnăm 2023, kơlo ki mơnhông GRDP dêi kong pơlê hiăng châ dâng 7,1% tâk châ hên tâ tiô tơdroăng Mơ’no pơkâ dêi Hneăng hôp Đảng ƀô̆ kong pơlê, châ chía hên tâng vâ ngăn tơdjuôm tung lâp tơnêi têa, ối má 1 tung 14 to kong pơlê tung kơpong peăng kơnhŏng tơnêi têa. Liăn ngân ki mơdró kâ ing tơdroăng ôm hyô châ 1 rơpâu 750 rơtal liăn ƀă xuân cho hơnăm ki apoăng ôm hyô dêi kong pơlê châ a kơlo 1 rơtuh ngế tơmối troh ôm hyô.

Hơnăm kố, kong pơlê Điện Biên kô koh tơbâ 70 hơnăm hâi Plâ Ƀlêi trâng Điện Biên Phủ ƀă tơkŭm po hơnăm Ôm hyô Tơnêi têa-Điện Biên 2024, kong pơlê xuân hiăng hbrâ tung hnoăng cheăng ƀă pói rơhêng vâ châ hơ’lêh nhên khât tung mơnhông pêi cheăng kâ rêh ối pơlê pơla dêi kơpong Tây Bắc tung la ngiâ kố ah. Pôa Lê Thành Đô vêh mơnhên tối:

“Kăn ƀô̆, mơngế pơkuâ, mơngế pêi cheăng, khu mô đô̆i, kuăn pơlê mâu hdroâng kuăn ngo ƀă khu mơdró kâ dêi kong pơlê Điện Biên dế tơkŭm kơdo mơ-eăm mơnhông hnoăng cheăng tiô khôi hmâ dêi Điện Biên Phủ khên tơnôu, thăm mơdêk hơ’lêh nếo, hloh hlê rơkê plĕng, mơjiâng pro hên tơmeăm khoăng ki ai hlâu, ki kro dêi kong pơlê vâ ing mê, hbrâ kơteăng hơngế tâ nếo ‘na cheăng kâ rêh ối pơlê pơla, hnối kring vế tơniăn cheăng lêng, kring vế, gak ngăn tung lâp kong pơlê. Ing mê, pro mơjiâng chiâng hên hnoăng cheăng ki ai pơxúa kân khât vâ koh tơbâ 70 hơnăm hâi Plâ Ƀlêi trâng Điện Biên Phủ’’.

70 hơnăm klêi kơ’nâi plâ ƀlêi trâng 5 pâ, pro tơdro lâp plâi tơnêi mê cho tơdroăng ki ai pơxúa, ngiâ méa dêi chal nếo, ƀă tuăn hiâm hâk tơngăm mơjiâng ivá ki ó rơdêi mê rơtế ƀă ivá dêi tơdroăng tơrŭm dêi tâi tâng kuăn pơlê, Đảng ƀô̆, khu kăn pơkuâ, kuăn pơlê rêm hdroâng kuăn ngo a tíu kố hiăng ƀă dế mơnhông Điện Biên chiâng tíu ki bâ eăng drô troăng prôk hơ’lêh nếo a peăng mâ hâi lo dêi tơnêi têa.