Ƀă inâi “Droh rơtăm djâ troăng ahdrối mơhnŏng pleăng dêi hnoăng cheăng xua tŏng kum pơlê pơla”, tơdroăng kố po hên tơdroăng cheăng môi tiah: Khăm, hbru pơkeăng tê kơtê ăm mâu kuăn pơlê ƀuôn Drang Phôk, cheăm Krông Na, diâp liăn hriâm rơkê Kuăn roăng tơkăng kong; diâp rơxế mái ăm hok tro tơkâ luâ xơpá hriâm rơkê; diâp kơxô̆ liăn pơxiâm vâ pêi cheăng ăm droh rơtăm; pơxiâm pro 1 toăng hngêi hơ-ui ƀă 1 toăng hngêi mơdrah ăm o.

Tơkŭm lo lăm pêi cheăng mâu khu droh rơtăm ki pleăng dêi hnoăng cheăng pro “ƀom kloăng hdrê”, Hơ’lêh kơxô̆ ƀă Rak tơniăn a troăng prôk. Tŏng kum liăn pro Um meăn Pôa Hồ ƀă lêng mố đô̆i gâk tơkăng kong ƀă hên tơdroăng ki ê. Rơtế amê, tung rôh kố, Khu pơkuâ ngăn Đoân Droh rơtăm Dak Lak hiăng diâp 20 kơtâ lơgât “Hâk tơngăm môi kơdung ngo têa” ăm Kơdum kong ilâng Yok Đôn ƀă mâu đông mố đô̆i gâk tơkăng kong: Yok Đôn, Bo Heng ƀă Srêpok. Lăm pôu, hbru tơmeăm ăm rơpŏng lêng dế pro mố đô̆i a tíu tơkăng kong. Tâi tâng kơxô̆ liăn ‘no ăm tơdroăng kố cho lối 400 rơtuh liăn.