Thươ̆ng tươ̆ng Lương Tam Quang, Ngế cheăng tung Tíu xiâm Đảng, Ngế xiâm phŏ pơkuâ Kŏng an, Ngế xiâm pơkuâ Tiêuh ƀan gâk kring tơniăn pơkuâ po rôh hôp. Pơkâ thế ‘na hnoăng cheăng rak vế gâk kring tơniăn ƀă Leh Tơbâ 70 hơnăm ƀlêi trâng Điện Biên Phủ ƀă mâu tơdroăng cheăng tơkŭm po kân ki ê châ Khu xiâm ngăn Kŏng an mâu tíu pêi cheăng, kong pơlê tơbleăng, rak tơniăn tơdroăng vâ pêi, pơkâ thế pêi pro rĕng pơkâ mơ’no.

Thươ̆ng tươ̆ng Lương Tam Quang tối nhên, tung la ngiâ ah, ai 3 tơdroăng ki kân dêi tơnêi têa po a Điện Biên ƀă Đà Nẵng. Kŏng an mâu tíu pêi cheăng, kong pơlê athế môi tuăn hlê plĕng túa tơmiât vâ pêi mê cho rak tơniăn khât gâk kring, rak tơniăn ăm mâu tơdroăng ki tơkŭm po mê châ ƀlêi chiâng; pôi tá ăm ai tơdroăng klâi ki ôh tá tơniăn. Klêi mê, tối nhên, kố cho hnoăng cheăng kal kí dêi tâi tâng khu Kŏng an kuăn pơlê tung 6 khế apoăng hơnăm.

Pôa Lương Tam Quang, Ngế xiâm phŏ ngăn Kŏng an pơkâ thế mâu tíu pêi cheăng, kong pơlê pôi tá tơngôu, athế hbrâ kơchăng; hbrâ rơnáu ‘nâi nhên mâu tơdroăng, pơkâ tơleăng tâi tâng mâu tơdroăng ki ai tơdjâk troh gâk kring tơniăn ing kong pơlê.