Vâ hbrâ ăm Hneăng hôp tơpui tơno mâu kơ koan tơdjâk hiăng tơkŭm po mơjiâng pơkâ pêi; troh nôkố hiăng tơdah châ 70 ƀai tham luâ̆n. Tơdroăng xiâm mâu tham luâ̆n tơkŭm pro mơnhên troăng prôk ƀă tơdroăng hnê mơhno dêi Đảng tung roh plâ xâ Pơhlăng, ki má lối cho troăng tơmiât pêi ton xŏn dêi Đảng, Kăn xiâm hnê ngăn tơnêi têa hneăng hdrối Hồ Chí Minh, Tổng Quân ŭy (nôkố cho Quân ŭy Tơnêi têa), Khu xiâm pơkuâ mô đô̆i ƀă tơdroăng ki hbrâ tơdroăng tơplâ dêi lêng ƀă kuăn pơlê pin tung tơplâ xâ Điện Biên Phủ hơnăm 1954.

Hriăn plĕng pro mơnhên ngê̆ thuât tơplâ dêi tơdroăng tơplâ, xiâm kối ƀlêi trâng, ki kơnâ lich sưh ƀă mâu tơdroăng hriâm ki rơkê dêi Ƀlêi trâng Điện Biên Phủ.

Hôp tơpui tơno tiô tối hdrối kô châ tơkŭm po a hâi lơ 27/3/2024 la ngiâ, veăng kum mơdêk hlê plĕng pôu râng hnoăng cheăng dêi kăn bô̆, giảng viên, hok viên, nhân viên, mâu lêng dêi Hok Viê̆n Chính trĭ, Khu xiâm pơkuâ lêng ƀă kăn ƀô̆, nhân viên dêi Viê̆n Lich sưh Đảng, Hok viê̆n Chính trĭ Kuô̆k ya Hồ Chí Minh ƀă Hlá tơbeăng Quân đô̆i Nhân dân ƀă tơdroăng mơjiâng ƀă gâk kring tơnêi têa Việt Nam xah hô̆i chuh ngiah tung chal nếo.