Jâ Võ Thị Ánh Xuân - Kăn xiâm phŏ hnê ngăn tơnêi têa kheăn kơdeăn mâu tơdroăng mơnhông lĕm tro tung tơrŭm cheăng pơla Việt Nam - Swiss klêi kơ’nâi lối 50 hơnăm mơjiâng tơrŭm cheăng tơpui kâ, ki má lối cho tung mâu kơvâ cheăng kâ, tê mơdró, mơ’no liăn cheăng, khôi túa lĕm tro hnê hriâm, trâm mâ pơla kuăn pơlê; pơkâ thế péa pâ pơtối thăm tơpui tơno khu râ kăn mâu râ, ki má lối cho râ kăn xiâm, vâ mơdêk tâi tâng tơrŭm cheăng pơla péa pâ ƀă hên pâ.

Jâ Viola Amherd  - Kăn xiâm pơkuâ kong têa Swiss kheăn kơdeăn mâu tơdroăng châ tơƀrê tung cheăng kâ, pơlê pơla dêi Việt Nam tung mâu hơnăm hiăng hluâ; mơnhên Swiss đi đo nhuô̆m tơrŭm cheăng nhŏng o, tơrŭm tung hên kơvâ cheăng ƀă Việt Nam, tơdrêng amê tối péa tơnêi têa ối hên tơnêi lôi chúa, tơmeăm khoăng ăm tơrŭm cheăng kâ, tê mơdró, mơ’no liăn cheăng.

Kăn xiâm pơkuâ kong têa Swiss tối troăng tơmiât dêi jâ Võ Thị Ánh Xuân  - Kăn xiâm phŏ hnê ngăn tơnêi têa ‘na ki kơnía, ki kal dêi tơdroăng tơdâng tơ’mô pơla kơdrâi kơnốu ƀă mơdêk hnoăng vâi kơdrâi hdrối mâu tơdroăng lâp plâi tơnêi ôh tá tơniăn môi tiah dế nôkố.