Kơxo lơ 21/3/2024, Hneăng hôp ôh tá tối hdrối rôh má 6, Kuô̆k hô̆i hneăng 15 hiăng po rôh hôp a Hngêi Kuô̆k hô̆i, Pơlê kong xiâm Hà Nội xua tơdroăng pơkuâ po dêi pôa Vương Đình Huệ, Kăn xiâm hnê ngăn Kuô̆k hô̆i vâ pêi pro tơdroăng séa ngăn thâ pơtê pro kăn xiâm hnê ngăn tơnêi têa Kŏng hoa xah hô̆i chuh ngiah Việt Nam pơla hơnăm 2021 – 2026 ƀă thế pơtê cheăng tung Kuô̆k hô̆i hneăng 15 ƀă pôa Võ Văn Thưởng ối tung Khu kăn Kuô̆k hô̆i pơlê kong kân Đà Nẵng.

Klêi hmâng hlá mơ-éa pơchuât, mâu rơkong tơpui dêi pôa Võ Văn Thưởng, Kuô̆k hô̆i hiăng tơpui, tâ phĭu pơkí ƀă tơbleăng Pơkâ ‘na tơdroăng ki thế pơtê pro kăn xiâm hnê ngăn tơnêi têa Kŏng hòa xah hô̆i chuh ngiah Việt Nam pơla hơnăm 2021 – 2026 ƀă thế pơtê pêi hnoăng cheăng Kuô̆k hô̆i hneăng 15 ƀă pôa Võ Văn Thưởng ối tung Khu kăn Kuô̆k hô̆i Pơlê kong kân Đà Nẵng.

Klêi kơ’nâi mơgêi rôh hôp ki ôh tá tối hdrối rôh má 6, Kuô̆k hô̆i hneăng 15, séa ngăn Kơxop hlá mơ-éa Luât tơnêi têa Kŏng hoa xah hô̆i chuh ngiah Việt Nam ƀă pơkâ dêi luât ki ai tơdjâk troh, Vi ƀan pơkuâ Kuô̆k hŏi hiăng pơkâ Tơbleăng ‘na tơdroăng pêi pro hnoăng pro kăn xiâm hnê ngăn tơnêi têa Kŏng hòa xah hô̆i chuh nghiah Việt Nam. Tiah mê, jâ Võ Thị Ánh Xuân, Kăn xiâm phŏ hnê ngăn tơnêi têa pôu râng hnoăng pro Kăn xiâm hnê ngăn tơnêi têa Kŏng hòa xah hô̆i chuh ngiah Việt Nam ing hâi lơ 21/3/2024 tá troh Kuô̆k hô̆i pôk kăn xiâm hnê ngăn tơnêi têa ki nếo ah.