Kơpong tíu chôu ‘măn tơmeăm khoăng ton nah Tơnêi têa ki phá krê ATK Định Hóa, tíu Pôa Hồ Chí Minh, Kăn xiâm hnê ngăn tơnêi têa hneăng apoăng rơtế Khu xiâm Đảng, Chin phuh ối ƀă pêi cheăng, khu râ kăn pơkuâ roh tơplâ xâ hbrâ mơdât khu xâ Pơhlăng nah. Tung tơdroăng po kân krip mê, jâ Võ Thị Ánh Xuân ƀă mâu kăn tung Khu hiăng têk nhang, pleăng rơvĭng reăng, tâp nhang tơbâ ƀă mơhno hiâm mơno pâ mơnê kân kĭn dêi tâi tâng Đảng, tâi tâng kuăn pơlê pin ƀă hnoăng kân kĭn ôh tá kâi tối dêi Pôa Hồ Chí Minh, Kăn xiâm hnê ngăn tơnêi têa hneăng apoăng.

Khu râ kăn tối kô pơtối hriâm tâp ƀă pêi tiô troăng hơlâ, hiâm mơno dêi Pôa Hồ; kơhnâ, kơdĭng, hiâm mơno lĕm, tâi hiâm mơno pêi cheăng ăm Tơnêi têa, ăm kuăn pơlê. Roh kố, jâ Võ Thị Ánh Xuân hiăng diâp kơxuô tơmeăm ăm 50 ngế ai hnoăng ƀă kăch măng ƀă 200 ngế vâi hdrêng ai tơdroăng rêh ối pá puât a tơring Định Hóa.