Peăng xêi hâi lơ 31/3, Khu pơkuâ hnê ngăn Đảng kong pơlê Kon Tum hiăng tối tơbleăng ƀă pơkâ tơdroăng vâ rah xo Kăn pơkuâ hnê ngăn Đoân Droh rơtăm chiâng Kăn Ƀơrô pơkuâ hnê ngăn Đảng kong pơlê. Tiô tơdroăng pơkâ mê, Khu pơkuâ hnê ngăn Đảng uỷ kong pơlê Kon Tum hiăng rah xo, xing xoăng ƀă pôu hnoăng ăm pôa Xiêng Thanh Phúc, hdroâng kuăn ngo Jêh - Triêng, kot mâ hơnăm 1983 a cheăm Dak Nông, tơring Ngọc Hôì, kong pơlê Kon Tum.

Pôa Xiêng Thanh Phúc pêi cheăng Đoân ing hơnăm 2008 châ hriâm troh thak sih pơkuâ ngăn tơdroăng cheăng. Ing hơnăm 2016 troh nôkố, pro Kăn pơkuâ hnê ngăn Đoân Droh rơtăm kong pơlê Kon Tum. Xông tơpui pôu râng dêi hnoăng cheăng cho Kăn Ƀơrô dêi Khu kăn pơkuâ hnê ngăn Đảng kong pơlê Kon Tum, pôa Xiêng Thanh Phúc mơhno tối koh mơnê tơdroăng loi tơngah dêi Khu kăn pơkuâ hnê ngăn Đảng kong pơlê Kon Tum ƀă tơkêa kô ôh tá pơtê tơdroăng ki pơtối hriâm pât, hriâm hlê plĕng vâ tơring pêi pro klêi hnoăng cheăng ki pơcháu.

Hdrối mê, a hâi lơ 30/3, Khu pơkuâ hnê ngăn Đảng kong pơlê Kon Tum hiăng tơkŭm po hâi Leh tối tơbleăng ƀă pơcháu hnoăng cheăng  hơ’lêh cheăng, xing xoăng hnoăng cheăng ƀă rah xo pôa Thái Văn Tưởng, Ngế cheăng tung Khu pơkuâ hnê ngăn Đảng kong pơlê, Kăn Ƀơrô ngăn ‘na Đảng hơ’lêh pro Kăn pơkuâ hnê ngăn Đảng tơring Đăk Glei.