Leh mơdĭng tơbâ plâ ƀlêi trâng Ngọc Hồi - Đống Đa ki hmâ tối cho leh mơdĭng gò Đống Đa châ tơkŭm po a hâi má 5 Têt Lo hơnăm nếo rêm hơnăm vâ tơbâ hnoăng ki kân dêi mâu ngế tơplâ khên tơnôu xâp ếo chế Quang Trung - Nguyễn Huệ rơtế ƀă mâu kăn lêng, mâu lêng Tây Sơn ƀă kuăn pơlê dế mê nah, hiăng tơplâ khên tơnôu plâ xâ ‘mêi ki tơbriât pơkuâ, kring vế tơniăn hdroâng mơngế.

Kố xuân cho môi tung mâu tơdroăng leh mơdĭng tiô khôi hmâ ton nah ki kân má môi dêi Pơlê kong kân Hà Nội, vâ tơbâ tơdroăng ki lĕm ton nah, tơdroăng tơplâ khên tơnôu dêi hdroâng mơngế. Tiô Hlá mơ-éa ton nah chêh ‘măn, rơnó Hơngui hơnăm Kỷ Dậu 1789, kơnôm kăn pơkuâ rơkê khên tơnôu hnê djâ mâu lêng khên tơnôu sâp ếo ché Quang Trung, mâu lêng Tây Sơn hiăng lăm pơtrui plâ rơdêi, plâ ƀlêi trâng 29 rơpâu khu lêng Mãn Thanh ki mot tơbriât pơkuâ, châ pro tơleăng lĕm, pơlê xiâm Thăng Long.

Ing mê, rêm rôh troh rơnó Hơngui, leh mơdĭng tơbâ plâ ƀlêi trâng Ngọc Hồi - Đống Đa châ tơkŭm po, tơ’mot chât rơpâu ngế kuăn pơlê, tơmối ing ê troh veăng leh, chôu nhang tơbâ mâu ngế khên tơnôu dêi hdroâng mơngế dêi mâu lêng Tây Sơn.