Khế 4 rơnó tô khăng khoăng Tây Nguyên kong tô môi tiah tô on. A plông pơtâp tơdroăng cheăng, chât ngế kăn ƀô̆ mâu lêng Ƀơrô Kan sat cơ đô̆ng Kŏng an kong pơlê Dak Lak xuân kơhnâ pơtâp. Thâ xut têa kơxôu, Trung ŭy Hứa Văn Hòa tối ăm ‘nâi:

‘’Á rơtế tâi tâng kăn ƀô̆, mâu lêng pêi cheăng tung khu Kan sat troh lâp lu đi đo pơtâp, hriâm tâp, hriâm ‘na tơdroăng kal kí. Ngin đi đo pơtâp tơchok, tơdroăng tơplâ, xuân môi tiah chiâng xúa mâu pháu hnêa vâ hbrâ rơnáu tơplâ, tơdah ƀă pêi kêi đeăng lĕm tro rêm hnoăng cheăng châ pơcháu’’.

Hbrâ rơnáu tơplâ tung rơxông nếo, hnoăng kân tung tơplâ xâ nếo má môi cho khế 6/2023, khu kan sát troh lâp lu Dak Lak hiăng rĕng rơtế mâu tíu cheăng rup khu tơtrâ ai râng pháu hnêa a Čư Kuin. Tiô Thươ̆ng tă Vũ Thành (77 hơnăm) – Kăn pơkuâ Ƀơrô Kan sát cơ đô̆ng kŏng an kong pơlê Dak Lak tối krê, Tây Nguyên tối tơdjuôm cho tíu tíu pêi cheăng ton xŏn ‘na gâk kring cheăng lêng, đi đo tro mâu ngế ki hêng hôu ‘nhê tơnêi têa.

Lối 30 hơnăm pêi cheăng tung khu kan sát troh lâp lu trâm hên tơdroăng rơ-iô, tơdroăng ki pâ trâu má môi ƀă pôa Vũ Thành cho roh lăm pơtrui rup hơnăm 1977 rup Hoàng Huân, môi ngế kăn pơkuâ Fulro a tơring Dak Mil:

“Hoàng Huân ing cheăm Đức Minh, Đức Mạnh rơtế lối péa ngế Fulro kơtâu mot tung kong tơrŭm ƀă Trung đoân 64 Fulro dêi Y Klơng. Ki xiâm dêi ngin cho tăng troăng vâ rôih hnâp khu râ kăn tơring Dak Mil. Ngin po péa roh pơtrui rup, 5h kơxo hâi lơ 6/4/1977, ngin klâ pro 2 troăng lăm pơtrui rup ing kơxo má troh kơhâi dế mê châ hlo troăng vâi kơtâu. Á tâng chuât rơ’jíu khu ki tơtrâ po, ƀă ‘nâi tíu khu ki tơtrâ mê ngin troh achê mê bă châ hlo Huân mê pĕng hlối 3 xôh mê pro Huân tro ‘mrâm pháu kơtong a tơnêi mê tro ngin rup. Kơ-êng Hoàng Huân mê hiăng châ rup tâi tâng vâi ƀă to lâi chât ngế vâi hiăng ôh tá khên xếo, troh a ngin tối dêi tơdroăng xôi’’.

Thươ̆ng tă Cao Tiến Phu – Kăn pơkuâ Ƀơrô kan săt cơ đô̆ng Kŏng an kong pơlê Dak Lak, tối ăm ‘nâi, 50 hơnăm hiăng hluâ, rơtế ƀă pêi pro lĕm tro hnoăng cheăng gâk kring tơniăn tâi tâng mâu tíu cheăng kal kí, cheăng kâ, rêh ối pơlê pơla ki kal dêi tơnêi têa ƀă kong pơlê, khu kan sát cơ đô̆ng Dak Lak hiăng tơplâ châ tơƀrê mâu khu ki xôi rơ-iô môi tiah mâu ngế ki tong tơmeăm, kơdê mơngế, matŭi ƀă hía hé, rak tơniăn gâk kring tung kong pơlê. Mâu hơnăm klêi kơ’nâi tơleăng lĕm, kơ koan cheăng hiăng pêi rơpâu roh pơtrui rup Fulro, kơdê ƀă rup rêh hrĭng ngế tơtrâ, rup xo hên pháu hnêa, ‘mrâm pháu, tơmeăm tơplâ ƀă mâu tơmeăm ki tơdjâk. Krê roh tơtrâ hâi lơ 11/6/2023 a Čư Kuin, mâu kăn ƀô̆, mâu lêng hiăng pơtrui rup 11 ngế tơtrâ, rup xo hên pháu hnêa, tơmeăm vâ tơplâ.

Thươ̆ng tă Cao Tiến Phu tối ăm ‘nâi, kăn ƀô̆, mâu lêng tíu cheăng pơtối hriâm tâp, mơdêk tơdroăng khên tơnôu kal kí ƀă tơdroăng ki rơkê tung pêi cheăng, hbrâ tơplâ ƀă rêm ngế xôi tung rêm tơdroăng.

“Ngin pơtối mơnhông khôi túa khên tơnôu ƀă mâu túa ki rơkê kơnâ dêi mâu rơxông kăn pơkuâ Ƀơrô Kan sát gâk kring hdrối nah, Kan sat troh lâp lu nôkố ƀă đi đo mơhnhôk pêi pro, mơhnhôk tá hiâm mơno ăm kăn ƀô̆, mâu lêng tung tíu cheăng. Ngin tơkŭm po pơtâp ăm kăn ƀô̆, mâu lêng rế hía rế rơkê pêi cheăng, klêi mê pơtâp mơjiâng mâu tơdroăng pêi, troăng pêi vâ tơleăng mâu tơdroăng inhên tơniăn lĕm tro tơdroăng gâk kring tung kong pơlê’’.

Mâu hơnăm hiăng hluâ, ƀă hên hnoăng kân kĭn hiăng châ tơƀrê, Ƀơrô Kan sat cơ đô̆ng – Kŏng an kong pơlê Dak Lak hiăng hâk tơngăm châ Đảng, Tơnêi têa diâp inâi Tíu cheăng Ngế khên tơnôu khu lêng kuăn pơlê, Mê dái hnoăng cheăng kân kĭn râ má môi, Mê dái Quân công ối má pái ƀă hên pri kơnía ki ê. Kăn ƀô̆ mâu lêng kan sát cơ đô̆ng Kŏng an kong pơlê Dak Lak hâi kố dế pơtối khôi túa ngế khên tơnôu, tơxâng cho ‘’tơneăn meăm’’ ki krá kâk tung gâk vế tung kong pơlê ƀă tơniăn lĕm ăm kuăn pơlê mâu hdroâng kuăn ngo a Dak Lak.