Hiăng tâi hâi pơtê Têt âm lịch, ai rơpâu ngế kuăn pơlê a mâu kong pơlê kơpong Tây Nguyên to rơxế hon đa lăm a mâu kong pơlê peăng Hdroh rêh ối ƀă pêi cheăng. Pơla drô troăng prôk hrĭng km, kuăn pơlê tâ tơtô tung hiâm mơno drêng châ mâu kăn sát gak troăng prôk hbru tê kơtê têa ôu, kơƀăn mi, kên hơtô. Troăng kân 14 pơla troăng tơkâ luâ kong pơlê Dak Lak ƀă Dak Nông  tung mâu hâi ki kố kơxô̆ rơxế rế hên, kơdrâm mơngế to rơxế hon đa prôk troăng xŏn pơtối dêi rơpó prôk ngi kong pơlê peăng Hdroh môi tiah Đồng Nai, Bình Dương, Pơlê kong kân Hồ Chí Minh... vâ lăm pêi cheăng kâ.

Thiê̆u tă Nguyễn Thành Tâm, Kăn phŏ Đô̆i kăn sát gak troăng prôk kơxô̆ 1, Ƀơrô ngăn ‘na troăng prôk, kŏng an kong pơlê Dak Nông ăm ‘nâi, xĭng xoăng têa ôu, ăm kơƀăn mi, pôm ló tê kơtê cho môi tung hên tơdroăng pêi pro dêi  tíu pêi cheăng drêng tơbleăng tơdroăng rơtế ƀă mơngế ki prôk drô troăng tung rôh Têt Qúy Mão hơnăm 2023 ƀă púi vâ kum kuăn pơlê prôk troăng tơniăn.