Kơxo hâi lơ 3/4, Kăn xiâm Australia David Hurley ƀă kơdrâi pôa troh a Hà Nội, pơxiâm lăm pôu râ kăn xiâm troh Việt Nam tiô rơkong krếo thế dêi pôa Võ Văn Thưởng, Kăn xiâm hnê ngăn tơnêi têa têa. Hneăng lăm pôu ai pơxúa hên vâ mơhno, malối vâ troh leh tơbâ 50 hơnăm hâi mơjiâng tơrŭm pơla péa tơnêi têa (1973-2023).

Tiô hâi khế pơkâ hdrối, kơxo hâi lơ 4/4, a Hà Nội, Kăn xiâm Australia kô pleăng reăng a Tíu meăn chêh tơbâ inâi mâu lêng ki hlâ tơplâ khên tơnôu, ‘măn hơvĭng reăng hlối mot ngăn a Hngêi ‘măn poăng Pôa Hồ Chí Minh - Kăn xiâm hnê ngăn tơnêi têa ki apoăng. Pơtối mê, pôa Võ Văn Thưởng - Kăn xiâm hnê ngăn tơnêi têa kô pơkuâ leh tơdah khât ƀă hlối hôp tơpui tơno ƀă Kăn xiâm Australia a Hngêi pêi cheăng dêi Kăn xiâm hnê ngăn tơnêi têa.

Xuân tung hâi ki mê, pôa David Hurley kăn xiâm Australia kô tơpui tơno ƀă pôa Phạm Minh Chính, Ngế pro xiâm hnê ngăn Chin phuh, pôa Vương Đình Huệ - Kăn xiâm hnê ngăn Kuô̆k hô̆i. Tiô Kăn teăng mâ Australia, hneăng lăm pôa dêi pôa David Hurley kô veăng ‘no hnoăng mơdêk tơrŭm krá pơla péa tơnêi têa a tâi tâng rêm râ, ‘mâi mơnhông tuăn loi pơla péa tơnêi têa, cho tơdroăng ki nếo tơƀrê tung Hơnăm tơbâ tơdroăng kal mê.