Lăm pôu rơkâu Têt khu kăn Kuô̆k hô̆i kong pơlê Dak Lak, Kăn hnê ngăn Hô̆i đong Kuăn ngo Y Thanh Niê Kdăm khĕn kơdeăn ki mơ-eăm dêi mâu kăn Kuô̆k hô̆i kong pơlê Dak Lak tung tơdroăng pê klêi mâu tơdroăng cheăng, tơdroăng pêi pro tung hơnăm 2023. Pakĭng mê, Kăn hnê ngăn Hô̆i đong Kuăn ngo xuân tối tơ’nôm mâu tơdroăng cheăng dêi Kuô̆k hô̆i xuân môi tiah dêi Hô̆i đong kuăn ngo tung hơnăm hdrối nah ƀă pơkâ thế, tung hơnăm 2024, Khu kăn Kuô̆k hô̆i kong pơlê Dak Lak pơtối pêi tro hnoăng cheăng pơcháu, mơdêk ki tơƀrê, ivá cheăng dêi mâu kăn ki kuăn pơlê rah xo, jâ rơkong tơpui dêi kuăn pơlê, kuăn pơlê achê tâ ƀă Kuô̆k hô̆i.

Rôh kố, ing tơdroăng mơhnhôk tăng liăn ing mâu khu mơdró, khu ai tuăn hơ-ui, Kăn hnê ngăn Hô̆i đong Kuăn ngo hiăng pơcháu ăm Vi ƀan Măt trâ̆n Tơnêi têa Việt Nam kong pơlê Dak Lak tâi tâng kơxô̆ liăn 250 rơtuh liăn vâ rôe tơmeăm hbru ăm mâu rơpŏng kuăn ngo ki kơtiê xơpá tung kong pơlê drêng troh Têt Lo hơnăm nếo Giáp Thìn 2024.