Hơnăm 2024 ƀă tung 3 hơnăm apoăng tơbleăng Pơkâ hneăng hôp kân Đảng rêm râ, Bình Định hiăng tơkŭm tơbleăng pêi kơtăng, tơdâng mâu troăng rơhlâ mơnhông cheăng kâ - rêh ối, rak tơniăn tung kring vế, gak ngăn cheăng lêng, mơjiâng khu cheăng kal kí tung kong pơlê ƀă hiăng  hlo tơƀrê.

Troh nôkố ai 16/22 tơdroăng pơkâ ki hên dêi hneăng 2020- 2025 pêi châ luâ tơdroăng pơkâ. Tâi tâng tơmeăm pê lo dêi kong pơlê tâk 7,6%, ối má 17/63 tung lâp tơnêi têa. Tơdroăng cheăng kâ riân châ lối 117.000 rơtal liăn, ối má 5/14 tung kơpong tơdế tơnêi têa... Tơbleăng a rôh pêi cheăng, Kăn xiâm hnê ngăn Kuô̆k hô̆i Vương Đình Huệ khĕn kơdeăn mâu tơdroăng Bình Định hiăng châ pêi pro veăng ‘no hnoăng mơnhông pơtối mơdêk cheăng kâ, ối má môi tung kơpong.

Tung la ngiâ, kong pơlê Bình Định mơ-eăm troh hơnăm 2030 chiâng kong pơlê mơnhông khu ki djâ troăng ahdrối kơpong peăng Kơnhŏng Tơdế Tơnêi têa ƀă kĭng têa kơxĭ Tơdế tơnêi têa; xiâm ki kân dêi kơpong ‘na mơnhông cheăng kâ a têa kơxĭ, xiâm ôm hyô tơnêi têa. Kăn xiâm hnê ngăn Kuô̆k hô̆i pơkâ thế kong pơlê Bình Định mơ-eăm pê klêi mâu tơdroăng pơcháu pêi; tơngah ƀă loi khât tiah kố, Đảng ƀộ, mâu kăn ƀă kuăn pơlê kong pơlê Bình Định kô pơtối mơdêk ki mơ-eăm dêi “Tây Sơn’’, rĕng pêi tơdroăng púi vâ, pơkâ troh hơnăm 2030, Bình Định chiâng kong pơlê mơnhông mơdêk khu ki djâ troăng hdrối Peăng kơnhŏng tơdế tơnêi têa ƀă kĭng têa kơxĭ Tơdế tơnêi têa.

Tung hneăng lăm pôu kố, Kăn xiâm hnê ngăn Kuô̆k hô̆i Vương Đình Huệ hiăng mơhnhôk Khu xiâm kŏng Hàng hải Việt Nam kơjo kum kong pơlê Bình Đình pro 100 toăng hngêi tuăn pâ ƀă kơxô̆ liăn 5 tơtal liăn.