Kơxo lơ 18/1, pôa Kim Jin-pyo, Kăn xiâm hnê ngăn Kuô̆k hô̆i Hàn Quốc prế kơdrâi pôa rơtế ƀă Khu kăn xiâm Kuô̆k hô̆i Hàn Quốc lo ing pơlê kong xiâm Hà Nội, mơgêi tơniăn lĕm rôh lăm păng ‘nâng Việt Nam tiô rơkong krếo thế dêi pôa Vương Đình Huệ, Kăn xiâm hnê ngăn Kuô̆k hô̆i tơnêi têa pin, sap ing hâi lơ 12 – 18/1/2023.

Tung rôh lăm pôu, pôa Kim Jong-pyo, kăn xiâm hnê ngăn Kuô̆k hô̆i Hàn Quốc ƀă mâu ngế cheăng tung Khu hiăng ‘măn rơvĭng reăng, mot ngăn tíu ‘măn poăng Pôa Hồ Chí Minh; troh koh hmât pôa Nguyễn Phú Trọng, Kăn xiâm hnê ngăn Đảng; tơpui tơno ƀă pôa Phạm Minh Chính, Ngế pro xiâm hnê ngăn Chin phuh; tơpui tơno ƀă pôa Vương Đình Huệ, kăn xiâm hnê ngăn Kuô̆k hô̆i. A mâu rôh tơpui tơno, mâu kăn pơkuâ Việt Nam phiu ro kăn xiâm hnê ngăn Kuô̆k hô̆i Hàn Quốc lăm pôu Việt Nam tung pơla péa tơnêi nếo mơdêk tơrŭm cheăng chiâng tơnêi têa tơrŭm cheăng tung la ngiâ tơrŭm tung tâi tâng ƀă tơbâ 30 hơnăm mơjiâng tơrŭm cheăng tơpui kâ Việt Nam – Hàn Quốc.