Tơpui a rôh pêi cheăng, Kăn xiâm hnê ngăn Kuô̆k hô̆i Vương Đình Huệ tối nhên, Tơdroăng tơkêa Luât kơmăi kơmok xúa tung cheăng lêng, gâk kring ƀă mơhnhôk xúa kơmăi kơmok cho tơdroăng tơkêa ai pơxúa kal khât, ai hên tơdroăng ki kal xiâm, rơdêi vâ thăm mơdêk, ‘mâi mơnhông pro kơmăi kmok xúa tung cheăng lêng, gâk kring, mơdêk ki ai hlâu ‘na cheăng kâ dêi tơnêi têa.

Tơdroăng tơkêa luât cho vâ hơ’lêh mâu túa tơmiât, tơdroăng pơkâ dêi Tơnêi têa ‘na troăng hơlâ tŏng kum ăm kơvâ kơmăi kơmok xúa tung cheăng lêng, gâk kring. Kăn xiâm hnê ngăn Kuô̆k hô̆i Vương Đình Huệ mơnhên tối khât kơ koan pơkuâ chêh pro ƀă séa ngăn hiăng mơ-eăm tơbleăng, tơmâng xo ƀă rơnêu tơdroăng tơkêa luât. Tơdroăng tơkêa luât cho rôh vâ pro tơ’lêi ăm kơmăi kơmok xúa tung cheăng lêng, gâk kring mơnhông, malối cho tung pơla tơdroăng cheăng lêng kong têa ê ai hên ki hơ’lêh môi tiah nôkố.