Kăn xiâm hnê ngăn Kuô̆k hô̆i tối nhên,  tơrŭm cheăng pơla Kuô̆k hô̆i ôh tá xê to tối ăm dêi rơpó ‘nâi tơdroăng ‘na mơjiâng luât lơ ing mâu tơdroăng pơkâ. Mê ối cho tơdroăng tơhrâ  pro rơkong  tơpui chiâng pêi pro, pro tuăn tơmiêt chiâng ai khât ƀă pro tơdroăng ki tơngah chiâng rôh ki châ pêi pro khât ăm rơtal kuăn pơlê tung lâp plâi tơnêi.

Xua mê, mâu ngế teăng mâ ăm mâu ngế ai tuăn mơ-eăm, púi vâ dêi kuăn pơlê, thế tơniăn tiah kố, mâu luât tŏng gum, luât pơkâ mơjiâng ngăn ing mâu tơdroăng ki pơxía xiâm gá: hơniâp, tơdroăng ki tro ƀă ôh tá pơrah pơla kơdrâi kơnốu. Vâ ai mâu tơdroăng pơkâ, Kăn xiâm hnê ngăn Kuô̆k hô̆i tối nhên 4 tơdroăng pơkâ troăng hơlâ ăm tơdroăng tơrŭm dêi Kuô̆k hô̆i tung la ngiâ. Pôa krếo tâi tâng  mâu kuô̆k hŏi tung lâp plâi tơnêi tí tăng tíu ki môi tiah, mơ-eăm tơkâ luâ tơdroăng pá, rơtế tơdjuôm mơjiâng môi tơdroăng rêh ối tung la ngiâ tíu ki rêm ngế kuăn pơlê xuân châ rêh ối tung tơdroăng hơniâp, tơtro ‘ló, hơniâp ro kro mơdrŏng.