Tơbleăng a rôh trâm mâ, pôa Vương Đình Huệ - Kăn xiâm hnê ngăn Kuô̆k hô̆i púi vâ, mâu kăn, mâu ngế rơkê, mâu bok ngăn tơdroăng khôp, kuăn ngo ki kơhnâ rơkê dêi pơlê kong xiâm Hà Nội kô pơtối rak vế pêi pro khât tâ nếo hnoăng cheăng tơná, cho mâu ngế ki xiâm vâ mơhnhôk; tơbleăng troh lâp lu, mơhno troăng ăm mâu kuăn pơlê, malối mơhno troăng ăm mâu rơxông nếo veăng ‘no hnoăng a mơnhông pơlê kong xiâm Hà Nội ƀă tung lâp tơnêi têa.

Kăn xiâm hnê ngăn Kuô̆k hô̆i khĕn kơdeăn tơdroăng hriăn plĕng dêi Vi ƀan Măt trâ̆n tơnêi têa dêi pơlê kong kân Hà Nội ƀă Kăn hnê ngăn pơlê kong kân Hà Nội hiăng tơkŭm po tơdroăng pêi pro tơdjêp ƀă mâu kăn mâu ngế rơkê, mâu ƀok ngăn tơdroăng khôp, mâu kuăn ngo ki rơkê ƀă tối, rôh trâm mâ kố  mơhno ki tơrŭm  dêi rơpó tâi tâng hdroâng mơngế, kố cho tơdroăng hmâ pêi pro ki lĕm tro kơnía git dêi hdroâng mơngế pin, mơhno ki môi tuăn môi mơno ƀă pêi pro, ‘nâi hnoăng cheăng dêi tơná cho kuăn pơlê kong xiâm kơhnâ rơkê, xua tơdroăng mơnhông tơƀrê tơdjuôm dêi pơlê kong kân Hà Nội ƀă tung lâp tơnêi têa.