Xông tơpui a roh trâm mâ, Kăn xiâm hnê ngăn Kuô̆k hô̆i Vương Đình Huệ kheăn kơdeăn troăng tơmiêt pêi rơkê dêi Khu pêi teăng mâ, khu kăn Kuô̆k hô̆i râ má môi cho mơngế kơdrâi hiăng tơrŭm tơkŭm po hên tơdroăng pêi cheăng ăm vâi nâ o kơdrâi. Kăn xiâm hnê ngăn Kuô̆k hô̆i tối rơdêi, mâu hneăng cheăng Kuô̆k hô̆i ƀă sap ing apoăng hneăng Kuô̆k hô̆i hneăng má 15 troh nôkố, Kuô̆k hô̆i đi đo ai tơdroăng ti tăng, pơhlêh nếo châ tơƀrê tâi tâng. Tung tơdroăng châ tơƀrê mê, pơrá ai hnoăng dêi mâu ngế kơdrâi pro Kăn teăng mâ Kuô̆k hô̆i, mâu nâ o tung mâu kơ koan dêi Kuô̆k hô̆i.

Kì rơhêng vâ tối, hneăng Kuô̆k hô̆i hneăng má 15 ai kơxô̆ Kăn teăng mâ Kuô̆k hô̆i cho ngế kơdrâi kơdrâm má môi tung 10 hneăng achê kố, châ 30,26%, kơxô̆ kố châ Kuô̆k hô̆i râ má môi mâu kong têa kheăn kơdeăn păng ‘nâng. Kăn xiâm hnê ngăn Kuô̆k hô̆i loi tơngah, mâu ngế kơdrâi pro Kăn teăng mâ Kuô̆k hô̆i kô pơtối mơnhông mâu tơdroăng châ tơƀrê hiăng châ, ai mâu tơdroăng veăng kum hên tâ mê nếo tơdroăng cheăng dêi Kuô̆k hô̆i, rơtế pêi hên tơdroăng châ tơƀrê kân vâ pro tơ’nôm khôi túa ƀlêi trâng ƀă tơmiêt troh leh tơbâ 80 hơnăm Kuô̆k hô̆i Việt Nam.