Tơpui a leh tơbleăng túa pơkâ, Ngế pro xiâm phŏ hnê ngăn tơnêi têa Trần Hồng Hà ăm ‘nâi, hlá mơ-éa chêh túa pơkâ kong pơlê Phú Yên châ bro ƀă túa ki tơƀrê, troăng ngăn ton xŏn ngăn tung tơdroăng ki ai hlâu phá tơvêh ‘na mâu kơxô̆ liăn ki ai ƀă túa lĕm tro. Pơkâ kong pơlê kô cho hlá mơ-éa chêh tŭm têk dêi mâu túa pơkâ, hnoăng cheăng pơkâ tơnêi tơníu tung tơrŭm cheăng krá tơniăn ƀă mâu kong pơlê kơpong Nam Trung bộ ƀă Tây Nguyên.

Vâ pêi châ mâu tơdroăng kố, Ngế pro xiâm phŏ hnê ngăn Chin phuh Trần Hồng Hà pơkâ thế Phú Yên kal châ hlo mâu tơdroăng ki rơkê tung mơnhông dêi mâu tơring cheăm tung kơpong, pơtối hơ’lêh nếo tơmiât rơkê, tăng hlo mâu troăng prôk krê vâ Phú Yên chiâng tíu ki rơhêng vâ ‘no liăn cheăng, rơhêng vâ pleăng, rơhêng vâ mơnúa.

Pơkâ kong pơlê Phú Yên hiăng mơnhên nhên troăng mơnhông Phú Yên tung la ngiâ ngăn tung 1 tơdroăng ki xiâm; 2 túa cheăng; 3 tơdroăng ki kal; 4 ivá mơnhông; 5 hnoăng cheăng ki kal ƀă pơkâ mơ’no troh hơnăm 2030, Phú Yên chiâng kong pơlê mơnhông tiô troăng tơmiât rơkê ƀă krá ton.

Pêi cheăng ƀă kăn pơkuâ kong pơlê Phú Yên, Kăn hnê ngăn Kuô̆k hô̆i Vương Đình Huệ pơkâ thế Đảng ƀô̆, kăn pơkuâ ƀă Kuăn pơlê kong pơlê Phú Yên pơtối tơbleăng tơƀrê mâu tơdroăng pơkâ dêi Tíu xiâm Đảng, Kuô̆k hô̆i, Chin phuh, ki kal rak vế châ mâu ivá mơdêk, ‘mâi rơnêu mâu tơdroăng ki xơpá vâ pêi pro châ mâu tơdroăng pơkâ ăm hơnăm 2024 ƀă tá hneăng cheăng; Kong pơlê xuân kal pôi tá préa, tí tăng mâu tơdroăng ki phá tơviah vâ mơjiâng, mê cho túa krê ai kong kế ki chiâng xêh, tíu cheăng tơnêi tơníu, khôi túa lĕm tro.

Hdrối mê, Kăn xiâm hnê ngăn Kuô̆k hô̆i Vương Đình Huệ pêi cheăng ƀă Khu pơkuâ ngăn Đảng kong pơlê Khánh Hòa ‘na klêi kơ’nâi pêi pro hnoăng cheăng kal kí hơnăm 2023, túa pơkâ hơnăm 2024 ƀă mơnhên tối klêi kơ’nâi tơbleăng pêi pro Pơkâ kơxô̆ 55 dêi Kuô̆k hô̆i ‘na pơkâ tíu pro, troăng hơlâ tŏng kum mơnhông kong pơlê Khánh Hòa ƀă veăng a Leh tơbleăng túa pơkâ kơpong kơphô̆ nếo Cam Lâm, Khánh Hòa.