Kơpong cheăng kâ Nhơn Hội châ mơnhên cho kơpong cheăng kâ ai hên kơvâ cheăng, ƀă ki xiâm mơnhông cho ôm hyô, tê mơdró, kơpong kuăn pơlê rêh ối tê mơdró, kơpong hngêi kơmăi kơmok, kơno tuk, on tơhrik vêh pro ƀă ká xi xŏng; cho kơ koan tơtêk, tơdjêp krá tơniăn ƀă tâi tâng ƀă tơdroăng mơnhông mơdêk tơdjuôm dêi Pơlê kong kơdrâm Quy Nhơn ƀă kơpong ki achê; Tíu xiâm khoa hok ƀă kơmăi kơmok, pơhlêh nếo tơmiât pêi rơkê, xúa ki rơkê tuăn ngôa rơkê kuăn mơngế kal khât dêi Việt Nam; tíu xiâm ôm hyô kân má môi dêi Việt Nam.

A roh leh, Kăn xiâm hnê ngăn Kuô̆k hô̆i Vương Đình Huệ rơtế khu râ kăn pêi cheăng, khu râ kăn pơkuâ kong pơlê Bình Định pêi pro tơdroăng phiu ro hiăng mơjiâng pro kêi kơpong hngêi kơmăi kơmok, tíu kơdrâm kuăn pơlê rêh ối ƀă tê mơdró Becamex VSIP Bình Định (Hneăng má 1) a cheăm Canh Vinh, tơring Vân Canh, kong pơlê Bình Định; châ hlo leh kĭ tơkêa tơrŭm cheăng mơ’no liăn cheăng pơla Becamex VSIP Bình Định ƀă mâu khu tơrŭm cheăng ƀă tâi tâng ki kơnâ 49 rơtuh dollars.