Xông tơpui a Leh pơxiâm mơjiâng pro troăng kân, pôa Nguyễn Tấn Tuân – Kăn hnê ngăn Vi ƀan kong pơlê Khánh Hòa tối ăm ‘nâi, tơdroăng tơkêa bro Troăng kân ing Troăng kân tơnêi têa 27C troh Troăng kân kong pơlê 656 – tơdjêp ƀă kong pơlê Lâm Đồng ƀă kong pơlê Ninh Thuận prôk tơkâ hluâ 2 tơring Khánh Vĩnh ƀă tơring Khánh Sơn châ mơnhên cho troăng kân ki kal tơnêi têa, troăng kân râ III kơpong kong ngo, xŏn dâng 56,7km.

Tâi tâng kơlo mơ’no liăn cheăng cho 1.930 rơtal liăn, hâi khế pêi pro tơdroăng tơkêa bro cho sap ing hơnăm 2023 troh tâi hơnăm 2027. Troăng kân ing Troăng kân tơnêi têa 27C troh Troăng kân kong pơlê 656 – tơdjêp ƀă kong pơlê Lâm Đồng ƀă kong pơlê Ninh Thuận cho troăng kân ki kal, tơdjêp 2 tơring kong ngo Khánh Sơn ƀă Khánh Vĩnh, pro tơ’lêi hlâu tung mơnhông cheăng kâ – rêh ối pơlê pơla 2 tơring kố tối krê ƀă kong pơlê Khánh Hòa tối tơdjuôm, mơdêk ivá tơdjêp troăng klông, pơto kế tơmeăm khoăng tơdjêp kơpong ƀă kong pơlê Lâm Đồng ƀă kong pơlê Ninh Thuận.

Klêi mê, thăm mơnhông cheăng lêng, gâk kring tung kơpong, mơjiâng troăng prôk troh lâp lu, chiâng prôk đi đo vâ tơniăn gâk kring, cheăng lêng; kum châ tơƀrê tơdroăng séa ngăn, pơkuâ, gâk ngăn kong.

Xuân tung hâi lơ 1/3, Kăn xiâm hnê ngăn Kuô̆k hô̆i Vương Đình Huệ rơtế khu râ kăn pêi cheăng hiăng diâp 200 toăng hngêi tuăn pâ ăm mâu rơpŏng kơtiê dêi tơring Khánh Sơn ƀă tơring Khánh Vĩnh.