Kăn xiâm hnê ngăn Kuô̆k hô̆i Vương Đình Huệ veăng ƀă xông tơpui a Leh mơhnhôk. Kăn xiâm hnê ngăn Kuô̆k hô̆i tối, khế Droh rơtăm rêm hơnăm cho tơdroăng ki kơnâ, pơxiâm tung rêm rơnó Hơngui nếo, rơnó dêi Rơxông ối nếo; cho troăng pêi châ xo vế ing tơdroăng nôkố dêi tơdroăng pêi droh rơtăm ƀă tơdroăng cheăng Đoân.

Kăn xiâm hnê ngăn Kuô̆k hô̆i kheăn kơdeăn Khu xiâm pơkuâ Đoân Droh rơtăm Kŏng san Hồ Chí Minh hiăng rah xo tơdroăng pơxá tơdroăng pêi cheăng hơnăm 2024 cho ‘’Hơnăm droh rơtăm pleăng hnoăng cheăng’’, mơnhên tơdroăng pơxá Khế Droh rơtăm hơnăm kố cho ‘’Droh rơtăm djâ troăng ahdrối pleăng hnoăng cheăng xua tơdroăng rêh ối pơlê pơla’’; tơkŭm po tơdrêng ƀă Leh pơxiâm pêi pro Khế Droh rơtăm ƀă Têt pêt loăng troh tá ah pâ Pôa Hồ tung rơtế tơdrêng, mơhno hiâm mơno pêi pro, khŏm mơ-eăm păng ‘nâng dêi mâu khu râ Đoân Droh rơtăm.

Mơhnhôk Têt pêt loăng troh tá ah pâ mơnê Pôa Hồ, Kăn xiâm hnê ngăn Kuô̆k hô̆i pơkâ thế mâu khu râ Đoân ƀă rơxông ối nếo dêi lâp tơnêi têa pơtối rak châ tơƀrê mâu tơdroăng pêi, troăng pêi rơkê tung tơdroăng pêt loăng, pêt kong, gâk ngăn kong prâi, hbrâ ví kong prâi hơ’lêh, rak kong prâi ngiêt, krúa, lĕm. Xuân tung tơdroăng pêi dêi khế droh rơtăm, Kăn xiâm hnê ngăn Kuô̆k hô̆i Vương Đình Huệ hiăng veăng Leh phiu ro hiăng mơjiâng pro kêi đeăng tíu chôu ‘măn kơxop mơ-éa krúa lĕm, tíu pơchuât kơxop mơ-éa ăm vâi hdrêng a cheăm Nam Thanh, tơring Nam Đàn ƀă chôu nhâng a Kơpong chôu ‘măn tơmeăm khoăng ton nah ki má môi Kim Liên, Kơpong chôu ‘măn tơmeăm khoăng ton nah Truông Bồn.