Tung chôu phut nhoăm pâ, teăng mâ Kuô̆k hô̆i, kuăn pơlê tung lâp tơnêi têa, Kăn xiâm hnê ngăn Kuô̆k hô̆i Vương Đình Huệ hiăng têk nhang xú lĕm mơhno hiâm mơno mơnê pâ pa kâi tui ƀă Kăn xiâm hnê ngăn tơnêi têa Hồ Chí Minh. Kăn xiâm hnê ngăn Kuô̆k hô̆i tơbleăng hnoăng a ngiâ Pôa, hơnăm 2023, Kuô̆k hô̆i hiăng pê klêi mâu tơdroăng cheăng ki kân.

Rôh apoăng tung rơxông 78 hơnăm pêi cheăng, Kuô̆k hô̆i hiăng tơkŭm po kơxô̆ rôh hôp hên má môi tung hơnăm ƀă 5 rôh hôp, séa ngăn, pơkâ teăm tơdrêng 84 tơdroăng ki kân, ki kal dêi tơnêi têa ai tiô pơkâ pêi tơdrêng, pro xiâm mơnhông tơƀrê hnoăng cheăng pêi tung hơnăm 2024 ƀă mâu hơnăm pơtối.

A ngiâ um mơhúa Pôa, Kăn xiâm hnê ngăn Kuô̆k hô̆i Vương Đình Huệ, ƀă mâu kăn tối vâ pơtối tơbleăng tơƀrê mâu tơdroăng cheăng pêi ing tơdroăng pơtối pơ’lêh nếo, rơtế tơrŭm krá ƀă Chin phuh, ƀă kuăn pơlê ƀă khu mơdró, mơnhông tơƀrê rĕng, krá tơniăn tơnêi têa, pro pơxúa tơdroăng rêh ối phâi tơtô, hơniâp ro ăm rêm ngế rêm hngêi, djâ tơdroăng rêh ối phâi tơtro hơniâp ro ăm rêm ngế kuăn pơlê, tơnêi têa rơtế ƀă mâu kong têa tung lâp plâi tơnêi môi tiah tơdroăng Púi vâ dêi Pôa hdrối vâ hlâ.