Hbru tơmeăm Têt ăm lối 360 rơpŏng  ai hnoăng, rơpŏng kơtiê, mâu ngế tro trếo ‘mêi rôh tơplâ nah, kŏng nhân, mơngế pêi cheăng ki kơtiê xơpá ai mâ a Hngêi mơhno túa lĕm tro rơhdruê xuăng kong pơlê Bạc Liêu, Kăn xiâm hnê ngăn Kuô̆k hô̆i Vương Đình Huệ tối nhên, Đảng Tơnêi têa, xuân môi tiah Kuô̆k hô̆i, Chin phuh tung tơdroăng pơkâ tơdroăng cheăng dêi tơná đi đo mơ-eăm mơnhông cheăng kâ-rêh ối vâ tơmâng tŏng kum ăm kuăn pơlê.

Tung la ngiâ, Kăn xiâm hnê ngăn Kuô̆k hô̆i pơkâ thế rêm râ ủy đảng, mâu kăn, Măt trâ̆n tơnêi têa ƀă mâu khu tung lâp kong pơlê hnê, tơbleăng pêi tro tơdroăng pơkâ kơxô̆ 26 dêi khu kăn hnê ngăn Đảng ‘na tơkŭm tŏng kum Têt Giáp Thìn 2024, rak tơniăn ăm kuăn pơlê; tơmâng tŏng kum ăm mâu rơpŏng ai hnoăng tơnêi têa, ai hnoăng kăch măng, rơpŏng kơtiê xơpá châ phiu ro rơnó hơngui, tơdah Têt tơtô ƀă tơniăn.

Xuân tung peăng xêi hâi lơ 25/1, Kăn xiâm hnê ngăn Kuô̆k hô̆i Vương Đình Huệ ƀă Khu kăn dêi Tíu xiâm trâm mâ Khu kăn Đảng  kong pơlê Bạc Liêu. Kăn xiâm hnê ngăn Kuô̆k hô̆i tối pơchân kong pơlê thâ mơjiâng pơkâ, tơdroăng pêi pro ăm tơtro pơkâ kơpong ing mê mơdêk tơ’mot khu ‘no liăn cheăng, tí tăng tơmeăm ai hlâu, ki rơdêi dêi kong pơlê, mơnhông cheăng kâ-rêh ối ƀă kring vế tơniăn cheăng lêng, tơniăn kơpong tơbăng kroăng Cửu Long troh hơnăm 2030, tơdroăng vâ pêi troh hơnăm 2045.