Tơpui tơno ƀă kăn ƀô̆, mâu lêng Trung đoân Không quân 921, Kăn xiâm hnê ngăn Kuô̆k hô̆i Vương Đình Huệ tối rơdêi, tơkâ hluâ 60 hơnăm mơjiâng, tơplâ ƀă xông kân, mâu rơxông kăn ƀô̆, mâu lêng dêi Trung đoân 921 hiăng đi đo mơ-eăm, pơtâp ƀă xông kân; châ hên ƀlêi trâng kân tung tơdroăng mơjiâng ƀă gâk kring Tơnêi têa.

Tung la ngiâ, Kăn xiâm hnê ngăn Kuô̆k hô̆i pơkâ thế Trung đoân pơtối hlê plĕng pêi pro, pêi pro kơtăng mâu pơkâ dêi Đảng, troăng hơlâ, luât dêi Tơnêi têa ‘na hnoăng cheăng tơniăn cheăng lêng – gâk kring. Rêm ngế kăn ƀô̆, lêng kal pơtối mơnhông hiâm mơno ‘’Mô đô̆i Pôa Hồ’’, ƀă loi tơngah khât kal kí krá tơniăn, khŏm mơ-eăm tơplâ, hbrâ tơdah ƀă kêi đeăng hnoăng cheăng châ pơcháu, môi tuăn tá hiâm mơno ƀă Tơnêi têa.