Tơpui a rôh pêi cheăng, Kăn xiâm hnê ngăn Kuô̆k hŏi Vương Đình Huệ mơnhên tối khât tơdroăng ki tơdrăng dêi kăn pơkuâ kong pơlê Gia Lai drêng tối mâu tơdroăng ki xơpá, ôh tá tơniăn dêi kong pơlê ƀă tối tiah kố, ngăn tơdrăng vâ hlo mâu tơdroăng ki tá hâi pêi klêi vâ mơ-eăm ‘mâi rơnêu cho tơdroăng ki kal khât.

Ƀă hiâm mơno ôh tá ăm ai tơdroăng ki apoăng hơnăm ôh tá niân, mơ’nui hơnăm tơbréa; Kăn xiâm hnê ngăn Kuô̆k hô̆i pơchân kong pơlê pêi pro klêi mâu tơdroăng pơkâ vâ pêi Tung tâi tâng kế tơmeăm dêi lâp kong pơlê dêi hơnăm 2024; ‘mâi rơnêu mâu tơdroăng ki tá hâi pêi klêi ‘na mâu kơvâ cheăng môi tiah hnê hriâm, hnê cheăng pêi; hnê mâu kăn pơkuâ, malối cho kăn ƀô̆ kơdrâi ƀă mâu kăn pơkuâ râ cheăm; pêi pro tro hnoăng cheăng hơ’lêh chêh pro hlá mơ-éa; xoăng liăn pêi cheăng tdjuôm; krếo thế tơ’mot ‘no liăn pêi cheăng tung uâ pơliê tơmeăm pêi lo ing chiâk deăng, loăng vâ mơdêk ki kơnía dêi tơmeăm, malối cho mâu kế tơmeăm OCOP.