Xông tơpui pơxiâm po, Kăn xiâm hnê ngăn Kuô̆k hô̆i tối ăm ‘nâi roh hôp roh kố séa ngăn 5 tơdroăng xiâm, tung mê tơtrŏng tung tơdroăng tơkêa bro Luât rak ‘măn (‘mâi rơnêu), tơdroăng tơkêa bro Luât ‘mâi rơnêu, tơ’nôm mâu troăng dêi Luât khu gâk kring; séa ngăn tơbleăng tơdroăng kuăn pâ thế, pơkâ thế dêi Kuô̆k hô̆i khế 1 ƀă mâu tơdroăng xiâm ki ê.

‘Na tơdroăng tơkêa bro Luât rak ‘măn (‘mâi rơnêu), mâu kăn teăng mâ kheăn kơdeăn tơdroăng tơkêa bro luât hiăng tơmâng xo, ‘mâi rơnêu hên rơkong pâ thế dêi mâu kăn teăng mâ Kuô̆k hô̆i a Hneăng hôp má 6. Kăn xiâm hnê ngăn Kuô̆k hô̆i pơkâ thế, sap ing kố troh drêng tơbleăng Kuô̆k hô̆i séa ngăn, tơbleăng ăm pêi pro ƀă troh drêng ahdrối kĭ mơnhên, kal pơtối séa ngăn vâ tơniăn ki tơdâng tơ’môi dêi khu luât, pơtih môi tiah mâu tơdroăng pơhlêh xúa kŏng ngê̆, rak ‘măn tung kŏng ngê̆, Chin phuh pêi cheăng xúa kŏng ngê̆, pơlê pơla pêi cheăng xúa kŏng ngê̆; séa ngăn ƀă Luât Kŏng ngê̆ thông tin, Luât gâk kring tơniăn măng, Luât châ achê tơdroăng, Luât gâk kring ki pơkí tơnêi têa, Luât tơmeăm kơnía khôi túa lĕm tro.