Tối tơbleăng akố, Kăn xiâm hnê ngăn Kuô̆k hô̆i Vương Đình Huệ khĕn kơdeăn, cheăng riân ngăn liăn ngân tơnêi têa hiăng pêi pro tro mâu hnoăng cheăng pêi, tơdroăng pơcháu pê tiô luât pơkâ ƀă tơdroăng pơkâ dêi luât. Pêi nhên khât, pêi tro hnoăng cheăng pơcháu dêi  Kuô̆k hô̆i, malối cho tơdroăng  séa ngăn mâu tơdroăng ki kal dêi Kuô̆k hô̆i.

Hơnăm 2024, tơdroăng cheăng pơkâ ăm rêm râ, mâu kơvâ cheăng pêi hngăm hngo khât, xua mê, Kăn xiâm hnê ngăn Kuô̆k hô̆i pơkâ thế Khu kăn Đảng ủy ƀă khu kăn pơkuâ hnê mơhno dêi kơvâ cheăng riân ngăn liăn pơtối tơbâ tung kơvâ cheăng, tơ’noăng pêi cheăng lĕm tơƀrê vâ troh hâi tơbâ 30 hơnăm mơjiâng kơvâ cheăng.

Riân ngăn liăn Tơnêi têa séa ngăn nhên tơdroăng cheăng rak ngăn dêi Kuô̆k hô̆i, Vi ƀan pơkuâ Kuô̆k hô̆i vâ pêi cheăng rế tơƀrê ăm  Kuô̆k hô̆i tung mơjiâng luât séa ngăn tơdroăng kal ƀă pơkâ mâu tơdroăng ki kal dêi tơnêi têa. Malối tung mơjiâng luât, vâ châ ‘nâi mâu tơdroăng ki ôh tá tro, ki pêi hâi rơhéa, ki tơvâ tơvân, tung pơla pêi hnoăng cheăng.