Tơpui a rôh trâm mâ, mâu kơ koan dêi Kuô̆k hô̆i, mâu kơ koan dêi Vi ƀan pơkuâ Kuô̆k hô̆i, kăn ƀô̆, mơngế pơkuâ, ,mơngế pêi cheăng dêi ƀơrô cheăng Kuô̆k hô̆i hiăng kơhnâ mơ-eăm, tơmiât rơkê pêi klêi mâu tơdroăng ki rơkê má môi dêi hơnăm 2023.

Tối nhên, hơnăm 2024 cho môi hơnăm ki tơviah, cho hơnăm mâu kơvâ cheăng, rêm râ, mâu kơ koan, kong pơlê pơrá athế mơdêk rơdêi vâ pêi klêi mâu tơdroăng pơkâ ‘na cheăng kâ rêh ối pơlê pơla dêi hneăng cheăng, Kăn xiâm hnê ngăn Kuô̆k hô̆i tối tiah kố, Kuô̆k hô̆i phiu ro ‘na mâu tơdroăng ki pêi klêi a hơnăm 2023, la pôi tá chiâng phêp tơmiât hiăng hôm, ôh tá vâ hmâng.

Tiô tối hdrối, tơdroăng cheăng dêi hơnăm kố hên, pakĭng mâu tơdroăng cheăng pêi tiah hmâ tung hnoăng cheăng mơjiâng luât, séa ngăn luât, pơkâ mâu tơdroăng cheăng ki kal dêi tơnêi têa ƀă hnoăng cheăng ki ê, Ƀơrô cheăng Kuô̆k hô̆i ối athế kơhnâ hbrâ rơnáu vâ pêi pro troh tơbâ 80 hơnăm hâi pôk kăn Kuô̆k hô̆i ki apoăng.