Kăn xiâm hnê ngăn Kuô̆k hô̆i Vương Đình Huệ tối nhên, roh lăm pôu pêi cheăng ki kơnía khât drêng péa tơnêi têa nếo leh tơbâ 10 hơnăm tơrŭm cheăng ton xŏn (2013 – 2023); loi tơngah châ tơƀrê dêi roh lăm pôu pêi cheăng kố cho tơdroăng ki kal vâ péa tơnêi têa rơtế tơmiât troh mơdêk tơrŭm cheăng ton xŏn to a râ nếo, tơmiât troh leh tơbâ 70 hơnăm 2 tơnêi têa mơjiâng tơrŭm cheăng tơpui kâ a hơnăm 2025.

A roh trâm mâ tơpui tơno, péa ngế kăn pơkuâ môi tuăn kal pơtối thăm tơpui tơno mâu khu râ, mơdêk châ tơƀrê mâu troăng tơrŭm cheăng nôkố, mơ-eăm djâ liăn ngân tê mơdró pơla péa pâ rĕng châ 15 rơtal dollars, péa pâ pro tơ’lêi hlâu ăm mâu tơmeăm tê ngi kong têa ê ki xiâm dêi 2 tơnêi têa; tối ăm dêi pó túa ki rơkê tơtro mơjiâng pơkâ vâ mơnhông kơvâ kơmăi kơmok; tŏng kum mơdêk mâu troăng hơlâ vâ mơdêk rĕng tơdroăng pơ’lêh on tơhrik; tơniăn pơkuâ xêh, tơniăn krê tung kơvâ on tơhrik ki vêh pro.

Kăn xiâm hnê ngăn Kuô̆k hô̆i pói vâ péa tơnêi têa pơtối tơrŭm krá tơniăn tâ tung tơdroăng pêi cheăng Chin phuh xuân môi tiah Kuô̆k hô̆i râ má môi vâ kum thăm rŭm môi tuăn, vâ môi tuăn sap apoăng troh tá tui lui, hnoăng xiâm dêi ASEAN, mơnhông hnoăng dêi IPA xuân môi tiah rak hơniâp lĕm, tơniăn kơpong.