Kơxo lơ 9/1, pôa Nguyễn Xuân Phúc, Kăn xiâm hnê ngăn tơnêi têa hiăng pơkuâ rôh hôp má 3 Khu hnê mơhno mâi hơ’lêh Luât xiâm tơnêi têa . Pôa Nguyễn Xuân Phúc, Kăn xiâm hnê ngăn tơnêi têa khĕn kơdeăn Khu kăn cheăng tung Tíu xiâm  hiăng hbrâ mâu tơdroăng chêh tối tơbleăng tơdroăng cheăng hiăng pêi pro tung hơnăm 2022 ƀă hên tơdroăng ăm ‘nâi, tơdroăng chêh ‘măn hên tung kơmăi ƀă pơkâ troăng rơhlâ tối tơbleăng tung hơnăm 2023 kô châ pêi pro; tơmâng xo mâu tơdroăng hnê tối tá hiâm mơno, dêi mâu kăn ki veăng hôp.

Môi tuăn ƀă tơdroăng cheăng pêi ki kal, tơdroăng pêi nhên dêi Khu hnê mơhno cheăng hơnăm 2023, kăn hnê ngăn tơnêi têa pơkâ thế pakĭng tơdroăng cheăng pêi tiô kơvâ cheăng xing xoăng pêi, mâu ngế tung khu hnê mơhno tơmâng hnê mơhno dêi mâu kơ koan hbrâ mơjiâng pơkâ, tơdroăng tơkêa pêi pro mâu tơdroăng ‘mâi hơ’lêh luât tối tung Pơkâ 27, xua mê cho môi tung mâu tơdroăng cheăng pêi ki kal dêi hơnăm apoăng tối tơbleăng pơkâ.