Troh nôkố, kong pơlê Dak Nông nếo xo liăn hâi châ 50% tung tâi  tâng kơxô̆ liăn ‘no mơjiâng tơmeăm khoăng tơnêi têa a hơnăm 2024. Hnê mơhnhông tơdroăng cheăng mê, Kăn hnê ngăn Vi ƀan kuăn pơlê kong pơlê Dak Nông hiăng hnê mơhno khu tơrŭm cheăng pơkâ séa ngăn tơdrêng a mâu tơdroăng tơkêa bro ki ai kơxŏ liăn ngân pêi châ bú iâ. Tiô pơkâ, tung măng tĭng la ngiâ, Vi ƀan kuăn pơlê kong pơlê Dak Nông kô tơkŭm 2 khu lăm séa ngăn, xua Kăn xiâm hnê ngăn ƀă kăn phŏ hnê ngăn pơkuâ djâ rêm khu kăn, lăm séa ngăn a 11 tơdroăng tơkêa bro a mâu tơrung Dak Mil, Čư̆ Jut, Dak Rlâp, Krông Nô ƀă pơlê kong kơdrâm Gia Nghĩa.

Kố cho mâu tơdroăng tơkêa bro dêi tơnêi têa ‘no mơjiâng pro troăng prôk, kâng rơchôa, ai pơxúa kal khât ƀă tơdroăng mơnhông cheăng kâ rêh ối pơlê pơla a kong pơlê, la tơdroăng pêi hrá, liăn ngân ăm vâ pêi bú iâ. Tung pơla séa ngăn, tơdrêng ƀă tơdroăng tăng ngăn nếo, tối mâu tơdroăng xơpá, tơvâ tơvân drêng tơbleăng pêi mâu tơdroăng tơkêa bro vâ tăng troăng tah ki xơpá tơvâ tơvân Vi ƀan kong pơlê Dak Nông kô séa ngăn hnoăng cheăng pêi tung mâu kăn hnê mơhno, tăng ngăn dêi mâu tíu pêi cheăng, mâu tíu pơkuâ ‘no liăn pêi, malối cho hnoăng  cheăng pêi dêi ngế pơkuâ.

Vi ƀan kuăn pơlê kong pơlê Dak Nông kô pơxâu kơtăng mâu khu ki lâi, ngế ki lâi mơhnŏng pro pá, chiâng hrá pêi pro tơdroăng tơkêa bro. Ƀă mâu tơdroăng tơkêa bro ôh tá ngah cha pơxúa, Vi ƀan kuăn pơlê kong pơlê Dak Nông mơ-eăm ‘mâi hơ’lêh kơxô̆ liăn ăm mâu tơdroăng tơkêa bro ki tơxâng ki tro tâ.