Kố cho tơdroăng tối tơbleăng châ pơtâng a roh Hôp mơgêi tơdroăng cheăng kơxô̆ 64 hơnăm 2018 dêi Khu pơkuâ hnê ngăn Đảng kong pơlê Gia Lai, tơkŭm po a peăng kơxo hâi lơ 29/11. Tối tơbleăng a roh hôp mê ăm hlo, ing hơnăm 2015 troh nôkố, kong pơlê Gia Lai hiăng kơhnâ khât tung tơdroăng ‘mâi rơnêu, tơ’mot ƀă tah lôi mâu kơ koan cheăng tơnêi têa ki cheăng ôh tá rơhéa lơ ai hnoăng cheăng ki bố bối, môi tiah dêi pó. Klêi kơ’nâi pêi pro tơdroăng kố, kong pơlê hiăng kơdroh 189 kơ koan cheăng tơnêi têa, tơdâng ƀă 17,5%.

Troh mơ’nui khế 6/2024, lâp kong pơlê ối 891 kơ koan cheăng tơnêi têa. ‘Na kơvâ hnê hriâm - châ hên má môi tung khu cheăng ‘na hlá mơ-éa-kong pơlê hiăng kơdroh 86 to hngêi trung mâm non ƀă phôh thong, tơdrêng ƀă 406 to hngêi trung. ‘Na pơkeăng ƀă khăm pơlât, kong pơlê hiăng tơkŭm mâu tíu xiâm ngăn ‘na pơkeăng ƀă khăm pơlât dêi tơring chiâng khu pơkuâ cheăng ki ki chiâng pêi pro hên tơdroăng cheăng, kơdroh 24 khu pơkuâ cheăng. Mâu khu pơkuâ ngăn’na cheăng túa lĕm tro, tơ’noăng ivá xuân châ ‘mâi rơnêu ối iâ, kơdroh châ 38% a râ tơring. Ƀă tơdroăng pơkâ khŏm rak vế, pêi pro tiô tơdroăng pơkâ dêi Khu xiâm pơkuâ hnê ngăn Đảng tơnêi têa, Gia Lai hiăng pêi pro klêi tơdroăng ki chêh, kĭ pơkâ mâu tơdroăng tơkêa bro ‘na hnoăng cheăng dêi mâu kăn ƀô̆ a mâu kơ koan cheăng dêi tơnêi têa tung hơnăm 2023.

Ing mê, mơjiâng ăm tơdroăng ki kơdroh mơngế cheăng ƀă ‘mâi rơnêu, xing xoăng hnoăng cheăng ki xiâm ăm kăn ƀô̆, mơngế pêi cheăng. Kong pơlê xuân dế pơkâ pêi pro hên troăng hơlâ vâ thăm mơdêk tơdroăng ‘mâi rơnêu, ƀă pơhlêh hnoăng cheăng dêi khu pơkuâ ngăn, rak tơniăn tơdroăng cheăng châ tơƀrê, ƀă pro ôh tá tơdjâk chiâng ôh ta tơniăn ăm hnoăng cheăng dêi tơnêi têa.