Leh tơbleăng mâu khu mơdró krá tơniăn a Việt Nam 2024 ƀă tơdroăng pơxá “Khu mơdró mơnhông tơná tung rơxông pêi cheăng ngiât lĕm” châ  châ Khu ngăn Mơdró kâ xua vâ mơnhông krá tơniăn Việt Nam dêi Khu tơrŭm Tê mơdró ƀă Kơmăi kơmok Việt Nam (VCCI) tơkŭm po kơmăng hâi lơ 29/11 a Hà Nội.

A rôh leh 100 khu mơdró krá tơniăn teăng mâ a mâu kơvâ cheăng pêi ƀă tê mơdró châ pơ-eăng inâi. Tơbleăng a rôh lêh, Kăn xiâm hnê ngăn VCCI, Ngế pơkuâ hnê mơhno Tơdroăng pêi pro khu mơdró krá tơniăn a Việt Nam (CSI) Phạm Tấn Công ăm ‘nâi, klêi séa ngăn dêi VCCI ƀă mâu khu mơdró châ pơxá inâi krá tơniăn dêi tơdroăng CSI tung vâ chê môi chât hơnăm hdrối hiăng mơhno, mâu khu mơdró mơ-eăm pêi túa cheăng pêi lo kế tơmeăm tê mơdró, krá kak, hmâ ƀă tơdroăng pơloăng mơnúa rĕng tăng ‘nâi plĕng mâu tơdroăng rĕng pêi pro rôh tơ’lêi hlâu dế po troăng ing tơdroăng vâ pơhlêh ngiât, pơhlêh kơxô̆ dêi khu mơdró.

Hơnăm kố tơdroăng mê tơ’mot vâ chê 500 khu mơdró tung lâp tơnêi têa, pêi cheăng a tâi tâng mâu kơvâ cheăng. A leh tơbleăng, Khu tơkŭm po tơdroăng khĕn kơdeăn ƀă pơ-eăng inâi 100 khu mơdró krá tơniăn a mâu kơvâ cheăng pêi tê mơdró mâu tơmeăm. Tung mê, Top 10 khu mơdró krá tơniăn châ xo kơxô̆ 50% khu mơdró tung tơnêi têa ƀă 50 khu mơdró ki ai liăn ‘no pêi cheăng ing kong têa ê.