Vi ƀan hnê ngăn kong pơlê Dak Lak hiăng pơkâ thế Hngêi rak liăn tơnêi têa Việt Nam ki ai tíu cheăng a kong pơlê Dak Lak thâ rĕng hnê tối, pơkuâ thế mâu ngêi rak liăn ki gum ‘na tê mơdró, mâu tíu ki ăm mung liăn ối tung hnoăng cheăng  tơnêi têa a kong pơlê kố pơtối kơjjo gum kơxô̆ liăn vâ ăm khu mơdró kâ, mâu kuăn pơlê châ mung liăn vâ tơniăn tung pêi chiâk pêi deăng, păn mơnăn mơnôa, tê mơdró kâ, uâ mơdiê, ƀă mơ’no tê kơphế tung pơla ing hơnăm 2024-2025.

Troh nôkố, mâu khu ki ăm mung liăn tung lâp kong pơlê kố hiăng ăm mung lối 8.700 rơtal liăn, tâk châ 10,3% tâng vâ pơchông ngăn ƀă rơnó hdrối. Mâu khu ki ăm mung luiăn tung kong pơlê kố tơkêa kô khŏm bê kơxô̆ liăn ƀă tơtrro tơniăn tŭm têk hnoăng ki mung liăn pêi chiâk pêi deăng, tê mơdró kâ, mơ’no tê kế tơmeăm dêi khu mơdró kâ ƀă kuăn pơlê. Hneăng krí kơphế hơnăm 2024, yă kơphế kloăng a kong pơlê Dak Lak kơnâ sap ing 110.000 liăn troh a 125.000 liăn 1 kilối, tâk hên tâ tâng vâ chê 70 troh a 80% tâng vâ pơchông ngăn ƀă kơlo ki ối a tơdế dêi rơnó krí kơphế a hơnăm nah, pro chiâng tơdjâk hên ‘na liăn ngân troh ƀă mâu khu mơdró kâ ki tí tăng rôe, uâ mơdiê ƀă mơ’no tê troh a kong têa ê.