Tơbleăng tiô tơdroăng hiăng kĭ tơhrâ tơrŭm mơnhông cheăng kâ -rêh ối pơla mâu kong pơlê kơpong Tây Nguyên ƀă Pơlê kong kân Hồ Chí Minh, hâi lơ 29/11, a pơlê kong kơdrâm Kon Tum, Vi ƀan kuăn pơlê kong pơlê Kon Tum ƀă Khu rak ngăn kơpong hngêi kơmăi kơmok Pơlê kong kân Hồ Chí MInh tơrŭm ƀă hlối tơkŭm po khoa hok “pơhlêh kơxô̆ tung pêi chiâk, rôh ki tơdjêp kơmăi kơmok pơla Tây Nguyên ƀă Pơlê kong kân Hồ Chí Minh”.

Hôp mê ai  150 ngế, mâu tơdroăng a rôh  hôp, pơhlêh kơxô̆ tung pêi chiâk a Tây Nguyên xuân ối cho môi tơdroăng ki nếo, trâm hên tơdroăng pơloăng mơnúa malối cho tơmeăm khoăng kơmăi kơmok ƀă tơdroăng mơngế ki vâ pêi cheăng ƀă kơmăi kơmok dêi kuăn pơlê hôm rơkê. Tơdroăng tơbleăng pơhlêh kơxô̆ tơhrâ kô pro pơhlêh tơƀrê, kum mâu kong pơlê kơpong Tây Nguyên ôh tá xê to mơnhông rơdêi mê ối mơnhông krá tơniăn tâ.  

Mâu ki rak ngăn, mâu ngế rơkê, mâu ngế cheăng khoa hok, khu mơdró ƀă mâu ngế hiăng rơtế tơpui tơno, tơbleăng tối troăng hơlâ vâ pêi pro veăng mơnhông tơdroăng pơhlêh kơxô̆ tung kơvâ pêi chiâk tung kong pơlê; mơdêk xúa khoa hok kơmăi kơmok tung pêi chiâk; mơdêk rôh ki tơ’lêi tơrŭm cheăng, tơdjêp ƀă kơchơ mơdró cheăng khoa hok ƀă kơmăi kơmok, tơmeăm pêi lo pơla mâu kong pơlê kơpong Tây Nguyên ƀă pơlê kong kân Hồ Chí Minh.