Peăng xêi hâi lơ 13/1, a tíu pêi cheăng Kăn xiâm hnê ngăn, mê Kăn xiâm hnê ngăn hiăng tơdah mâu kăn kong têa ê ki veăng mâu tơdroăng hôp, tơpui tơno koh tơbâ 50 hơnăm hâi kĭ tơkêa Paris ‘na pơtê tơplâ, vêh mơjiâng tơdroăng hơniâp lĕm a Việt Nam. Xông tơpui a roh tơdah mê, teăng mâ Kăn xiâm pơkuâ hnê ngăn Đảng, Tơnêi têa ƀă kuăn pơlê Việt Nam, Kăn xiâm hnê ngăn tơnêi têa Việt Nam hiăng mơnê mâu hiâm tuăn ki lĕm tro, tơdroăng tơrŭm, ki tơveăng kơnía git dêi mâu pú hmâ kong têa vâi ê hiăng ƀă dế kum ăm Việt Nam ƀă mơhno tối hiâm tuăn loi tơngah kơ mâu pú hmâ lâp plâi tơnkêi ki rơtế prôk ƀă kuăn pơlê Việt Nam tung tơdroăng mơjiâng ƀă mơnhông kring vế Tơnêi têa troh tá hâi kố.

Kăn xiâm hnê ngăn vêh mơnhên tối, Đảng, Tơnêi têa ƀă kuăn pơlê Việt Nam đi đo chôu vế mâu tơdroăng ki veăng kum dêi mâu pú hmâ lâp plâi tơnêi, ôh tá tơklâ pơla mâu hdroâng mơngế, tơdroăng kéa prăng lơ rơbông, tơdroăng tiô  khôp lơ ôh, đi đo ối pá kĭng Việt Nam tung mâu khế hơnăm ki tơplâ mơdât tơdroăng ki pá puih ó má môi.

Tơdroăng ki veăng kum tŏng veăng dêi pó kal kí mê hiăng chiâng môi pâ dêi tơdroăng roh ton nah ki tơplâ a rơxông ki Việt Nam xua tơdroăng ki tơniăn krê, tơ’lêi hlâu dêi Tơnêi têa, xuân môi tiah tơdroăng ki pro hơniâp lĕm, ki tơtro ƀă tơdroăng ki tiô luât tung lâp plâi tơnêi.