Chôu nhang tơbâ kơ pơtáu An Dương Vương, mâu kăn mơhno nhoăm pâ kơ ngế ki rơkê hiăng ai hnoăng mơjiâng ƀă rak vế tơnêi têa, rơkâu ăm tơnêi têa tơniăn lĕm, kuăn pơlê hơniâp ro, tơnêi têa xông rơdêi. Cổ Loa cho kơpong tíu tơbâ ton nah túa lĕm tro kơnía git dêi hdroâng mơngế Việt Nam.

Luâ to lâi  rơpâu hơnăm mơjiâng tơnêi têa ƀă rak vế tơnêi têa, Cổ Loa ối châ rak ngăn hên mâu tơmeăm ki kơnía ton nah, túa lĕm tro dêi hên hdroâng kuăn ngo. Malối tung rơxông apoăng mơjiâng tơnêi têa, kơpong tơnêi Cổ Loa mơhno nhên ki rơdêi rơtế ƀă mơngế tung tơdroăng ton nah Thục Phán An Dương Vương, ngế ki  pơkuâ pơtó a rơxông pơtau Hùng Vương, ai hnoăng mơjiâng tơnêi têa Âu Lạc.

Rôh kố, Kăn xiâm hnê ngăn tơnêi têa Võ Văn Thưởng rơtế ƀă mâu kăn xiâm tơnêi têa ƀă pơlê kong kân hiăng pêt loăng vâ tơbâ a tíu tơbâ ton nah pơlê xiâm Cổ Loa tơring Đông Anh.