Kăn xiâm hnê ngăn tơnêi têa Võ Văn Thưởng hiăng troh chôu nhang tơbâ pôa Trường Chinh - Kăn hnê ngăn 3 hneăng xo hnoăng pro Kăn xiâm pơkuâ hnê ngăn Đảng ƀă cho Kăn xiâm hnê ngăn Hô̆i đong Tơnêi têa sap hơnăm 1981-1987. Tơnêi têa ai mâu hnoăng môi tiah hâi kố, hiăng mơhno ki tro dêi tơdroăng hơ’lêh nếo ki pôa Trường Chinh cho ngế tối ƀă pơxiâm.

Kăn xiâm hnê ngăn tơnêi têa Võ Văn Thưởng xuân hiăng troh chôu nhang tơbâ Đại tươ̆ng Trần Đại Quang, Kăn xiâm hnê ngăn tơnêi têa sap hơnăm 2016 troh 2018. Cho ngế ki pơkuâ xiâm tơnêi têa, Kăn xiâm hnê ngăn tơnêi têa Trần Đại Quang hiăng mơhno ki chôu pâ tung hiâm mơno vâi pú hmâ tung lâp plâi tơnêi, veăng mơdêk ki rơdêi, ki nhoăm dêi tơnêi têa.

Drêng troh hơnăm nếo, Kăn xiâm hnê ngăn tơnêi Võ Văn Thưởng hiăng lăm pôu kăn xiâm hnê ngăn tơnêi têa hneăng hdrối Trần Đức Lương ƀă mâu kăn xiâm hnê ngăn tơnêi têa Nguyễn Xuân Phúc. Kăn xiâm hnê ngăn tơnêi Võ Văn Thưởng rơkâu mâu kăn xiâm rơtế ƀă on veăng rơpŏng hngêi mo lĕm châ, rêh ối lĕm ro, rêh ton hơnăm, pơtối veăng ‘no hnoăng, tuăn rơkê ƀă túa pêi cheăng vâ veăng ‘no hên hnoăng tâ nếo ăm tơdroăng mơnhông tơnêi têa.