Klêi tơmâng tơbleăng ‘na tơdroăng pêi pro tơdroăng tơkêa bro, Kăn xiâm hnê ngăn tơnêi têa Võ Văn Thưởng mơnhên kheăn kơdeăn tơdroăng châ tơƀrê ƀă tơdroăng pêi cheăng, pôu râng hnoăng dêi khu râ kăn pơkuâ hnê ngăn cheăng Đảng, khu râ kăn pơkuâ pơlê kong kân Hà Nội ƀă mâu kong pơlê Hưng Yên, Bắc Ninh, rơtế mâu khu xiâm, kơvâ cheăng, kơ koan, tíu cheăng, kong pơlê veăng tơdroăng tơkêa bro.

Kăn xiâm hnê ngăn tơnêi têa pơkâ thế, khu râ kăn pơkuâ hnê ngăn cheăng Đảng, Hô̆i đong kuăn pơlê, Vi ƀan kuăn pơlê, Vi ƀan Măt trâ̆n Tơnêi têa Việt Nam pơlê kong kơdrâm Hà Nội pơtối mơdêk hiâm mơno pôu râng hnoăng cheăng, pêi tiô hnê mơhno dêi Tơnêi têa, mâu pơkâ dêi Kuô̆k hô̆i, Chin phuh vâ pêi pro tơniăn tơdroăng mơjiâng pro, ki dâi lĕm tơmeăm khoăng, ôh tá ăm ai tơdroăng ki pro xôi.