Tiô rơkong krếo thế dêi pôa Võ Văn Thưởng, Kăn xiâm hnê ngăn tơnêi têa, Ngế pơkuâ xiâm tơdroăng cheăng Australia David Hurley ƀă kơdrâi pôa lăm pôu râ Kăn xiâm tơnêi têa troh Việt Nam sap hâi lơ 3 troh hâi lơ 6/4. Kơxo kố hâi lơ 4/4, a Tíu pêi cheăng dêi Kăn xiâm hnê ngăn tơnêi têa, pôa Võ Văn Thưởng rơtế ƀă kơdrâi pôa pơkuâ leh kân krip tơdah Ngế pơkuâ xiâm tơdroăng cheăng Australia David Hurley ƀă kơdrâi pôa.

Klêi leh tơdah, pôa Võ Văn Thưởng ƀă Ngế pơkuâ xiâm tơdroăng cheăng Australia  tơpui tơno, khĕn kơdeăn, tối mâu tơdroăng hiăng pêi tơƀrê ƀă pơkâ tơdroăng vâ pêi mơnhông tơrŭm cheăng péa tơnêi têa tung la ngiâ. Việt Nam prế Australia mơjiâng tơpui kâ sap hơnăm 1973, mơdêk râ tơrŭm cheăng Tâi tâng a hơnăm 2009, Tơrŭm cheăng tŭm tơdroăng hlối mơdêk nếo a hơnăm 2015 ƀă mơdêk troh Tơrŭm cheăng kân a khế 3/2018.

Australia cho môi tung mâu kong têa tơrŭm cheăng pơla péa pâ kum ODA ôh tá tơvêh ki kân má môi ăm Việt Nam. 50 hơnăm hdrối, Australia hiăng kơjo kum ODA am Việt Nam tâi tâng 3 rơtal AUD, tơ’mô ƀă 47 rơpâu rơtal liăn Việt Nam. Nôkố ai dâng 31 rơpâu ngế sinh viên ƀă sinh viên ki dế tí tăng ‘nâi plĕng hriâm tâp a Australia (90% ngế ‘no liăn lăm hriâm xêh).