Tơdah Kăn teăng mâ kng têa New Zealand, Kăn xiâm hnê ngăn tơnêi têa Võ Văn Thưởng mơnhên tối nhên ‘ló khât Kăn teăng mâ ai mâu ivá veăng kum kơhnâ ƀă tơƀrê, pro trâu hơngế tơ’nôm tơrŭm cheăng tơrŭm tơroâ ƀă tơrŭm pơla Việt Nam - New Zealand. Kăn xiâm hnê ngăn tơnêi têa rơhêng vâ, la ngiâ ah, maluâ a hnoăng cheăng ki lâi, Kăn teăng mâ xuân athế đi đo mơ-eăm mơhno hiâm mơno pâ mơnê ƀă mơdêk tơrŭm cheăng pơla Việt Nam - New Zealand.

Tơdah kăn teăng mâ Peru, Kăn xiâm hnê ngăn tơnêi têa rơkâu pôa Augusto Morelli pêi klêi hnoăng cheăng 6 hơnăm a Việt Nam, veăng kum kơhnâ ƀă tơƀrê khât tung hnoăng mơdêk tơrŭm cheăng tơniăn lĕm pơla Việt Nam – Peru. Peru cho kong têa ki tơrŭm cheăng ki kal dêi Việt Nam tung mâu kong têa tung kơpong châu Mih Latinh ƀă hiăng veăng kum troăng ngăn, môi tuăn tŏng kum dêi rơpó a mâu rôh hôp tung kơpong ƀă a kong têa ê. Kăn xiâm hnê ngăn tơnêi têa rơkâu Kăn teăng mâ pêi klêi hnoăng cheăng tung hnoăng cheăng nếo ƀă đi đo tơmiât troh mơdêk tơrŭm cheăng tơniăn lĕm Việt Nam - Peru.