Tơdah kăn teăng mâ Kŏng hòa Ba Lan Alessander Surdej xo pêi dêi hnoăng cheăng a Việt Nam, Kăn xiâm hnê ngăn tơnêi têa tơngah, Kăn teăng mâ kô ai mâu tơdroăng veăng kum kơhnâ vâ mơdêk tơrŭm cheăng pơla péa tơnêi têa. Kăn xiâm hnê ngăn tơnêi têa tối nhên, kuăn pơlê Việt Nam đi đo ngăn nhuô̆m môi tuăn ƀă tŏng kum mâu tơdroăng ki kơnía git ki kuăn pơlê Ba Lan hiăng ăm Việt Nam tung plâ mâu hơnăm tơplâ châ tơniăn krê tơnêi têa xuân môi tiah tung hnoăng cheăng mơjiâng ƀă mơnhông tơnêi têa hâi kố.

Tơdah kăn teăng mâ Tây Ban Nha Carmen Cano De Lasala, Kăn xiâm hnê ngăn tơnêi ro hâk hlo, tơrŭm cheăng péa tơnêi têa hlo tơƀrê khât tung mâu kơvâ cheăng. Kăn xiâm hnê ngăn tơnêi têa pơkâ thế péa tơnêi têa mơdêk tơdroăng tơngah tơdroăng kal kí, tơpui kâ, mơdêk mâu rôh pôu râ tơnêi têa ƀă rêm râ.