Hâi lơ 19/8, a Tíu pêi cheăng Kăn xiâm hnê ngăn tơnêi têa, pôa Lương Cường, Kăn xiâm hnê ngăn tơnêi têa ƀă kơdrâi pôa hiăng pơkuâ leh tơdah păng ‘nâng pôa igme Khesar Namgyel Wangchuck- Pơtáu kong têa Bhutan ƀă kơdrâi pơtáu lăm pôu râ kăn xiâm tơnêi têa Việt Nam.

Klêi kơ’nâi leh tơdah, péa pâ hiăng tơkŭm po tơpui tơno. Pôa Lương Cường, Kăn xiâm hnê ngăn tơnêi têa ƀă pôa igme Khesar Namgyel Wangchuck - Pơtáu kong têa Bhutan rơtế môi tuăn ăm tơrŭm cheăng nhŏng o pơla Việt Nam ƀă Pơtáu Bhutan châ tơbêng tuăn pâ nhŏng o phâi hơtô, tơdroăng môi tiah tung mâu ki kơnâ hiâm mơno ƀă troăng pêi la ngiâ, túa tơmiât tơdjuôm ‘na tơdroăng rêh ối mơnhông krá tơniăn.

Ing hiâm mơno mê, péa pâ môi tuăn đi đo pro krá tơniăn tơrŭm cheăng nhŏng o ƀă hlê plĕng dêi pó, mơdêk mâu roh lăm pôu râ tơnêi têa đi đo tâ; mơdêk kĭ tơkêa mâu tơdroăng môi tuăn tơrŭm vâ mơjiâng tơdroăng tơ’lêi hlâu vâ pêi pro mâu tơdroăng tơkêa bro, pêi cheăng inhên.  Pôa Lương Cường, Kăn xiâm hnê ngăn tơnêi têa phiu ro Bhutan po rơdâ tơrŭm, tơrŭm păng ‘nâng ƀă hbrâ mơjiâng tơdroăng pơkâ vâ thăm tơdjêp ƀă mâu kong têa ASEAN.

Klêi kơ’nâi tơpui tơno, mâu khu râ kăn pơkuâ hiăng châ hlo leh kĭ tơkêa mơ-éa ki kal tơrŭm cheăng pơla péa Chin phuh ƀă mơ-éa ki kal tơrŭm mâu kơvâ tơƀai péa tơnêi têa.